Premier League khelh zel tum Magpies leh Sunderland

Inrinni zan Premier League inkhelah table mawngphah lam team Newcastle United-in manager Rafael Benitez hnuaia an chak hmel hmasa ber hmuin 3-0 in Swansea City an hneh a, table mawng lama awm team pahnih inkhelah Sunderland chuan 3-0 a Norwich City hneh bawkin beiseina thar an nei ve leh ta.

Black Cats-in table-ah 18-na dinhmun luah chungin an hneh tak Norwich chu point khat chiahin an phak lo a, match khatin an khel tlem zawk bawk. Sunderland hnuaiah Magpies chu point hnihin an la hnufual a, Black Cats nen match 33 ve ve an khel tawh.

Beiseina thar nen Benitez

St James' Park-a inkhelah New-castle United-in Jamaal Lascelles, Moussa Sissoko leh Andros Townsend hmangin Swansea 3-0 in an hneh a, Magpies manager Benitez chuan an hnehna chuan beiseina thar a siamsak thu a sawi.

March 11-a Magpies enkawl ṭantu manager chuan, "Kan zavaiin kan hlim a, tunah chuan Premier League khelh zel hi a theih a ni tih hi kan ring leh tawh ang. Fan-te chuan vawiina ka player-te kha an khelh dana an khelh reng chuan kan him theih an beisei a, mi zawng zawngin tunah chuan min ring leh tawh a ni. Ka sawi fo tawh angin a tawp thlengin kan bei ang, tunah chuan he thu hi sawi pawh a nuam ta deuh e," tiin an hnehna vanga a rilru a dam thu a sawi.

Big 'Sam' a hahdam

Sunderland-in Premier League khelh zel beisei chungin Norwich City chu Fabio Borini, Jermain Defoe leh Duncan Watmore-te goal hmangin 3-0 in an hneh. Black Cats tan an hneh hi relegation battle an sual pui a nih avangin point ruk hlu tak hlawh chhuak ang an ni.

Black Cats manager Sam Allardyce chuan, "Dik taka sawi chuan kan dinhmun avangin ka hlauthawng a ni. Mahse, boruak sang tak hnuaia inkhelh kan zawh leh zawh loh in hre duh a nih chuan khelmual chhungah ka nau ten chhanna an pe tawh che u a ni. An hmaa harsatna awm zawng zawng hnehin kan naute khan 3-0 in hnehna min chanpui a ni," tiin a player-te a fak hle.

Norwich an him lo?

Hun pawimawhah Nor-wich-in point thum hlu tak an hloh a, an dinhmun chhiat zia Canaries boss Alex Neil-a'n a hai lo. Neil chuan, "Premier League khel zel turin harsatna paltlang tur a chhah telh telh a ni. Khelh ṭhat ringawt a ni lo a, a pawimawh ber chu hneh-na chan a ni. Match li chiah khelh tur kan nei tawh a, match hnihah tal hnehna chan kan tum ang," tiin theihtawp an chhuah chhunzawm tur thu a sawi.