PSG thinrim tuartu Caen

French Ligue 1 champion Paris St-Germain chu Champions League quarterfinal aṭangin Manchester City-in an pet chhuak a, league match an khelh lehna hmasa berah zahngaihna lantir miah loin an mikhual Caen chu 6-0 in an sawp.

Parc des Princes-a inkhelah striker Zlatan Ibrahimovic chuan goal hnih a khung bakah Blaise Matuidi, Edinson Cavani, Angel di Maria leh Maxwell te chuan goal khat ṭheuh an khung ve bawk.

Season tawp ruala PSG chhuahsan tum Sweden international Ibrahimovic hian tun season-ah a club tan league-ah goal 32 a khing tling ta chiah. Kum 1977-78 a Argentine striker Carlos Bianchi-a'n PSG tan season khat chhunga Ligue 1-ah bik goal 37 a khung hnua Ligue-1 a goal 30 khung tling leh thei hmasa ber a ni.

Champions League-ah beisei ang thleng zo lo mah se PSG hian nomawi dang pahnih an la beisei mek a, Thawhlehni zan hian French Cup semifinal-ah Lorient nen an inhmachhawn ang a, Inrinni khian Lille nen League Cup final an khel bawk dawn a ni.

An lungngaihna a la reh loh thu sawi-in Paris St-Germain coach Laurent Blanc chuan, "Goal ruk faiin chak mah ila Champions League semifinal kan luh phah chuan loh avangin kan chak lohna rilru na kha a la dam thei lo. Mahse hei hian tun season-a inkhelh hmabak kan la neihah rah ṭha a chhuah theih ka beisei," tiin a sawi.