Bayern tan nomawi a hnai

Robert Lewan-dow-ski goal hnih khung hmangin Bayern Mu-nich chuan Inrinni zan khan Schalke 3-0 in an sawp a, a zawna a vawi li nana Bundesliga title la turin vawi hnih chak bak an mamawh tawh lo. Bayern hian point 78 hmuin pahnihna Borussia Dortmund aiin point 10 in an sang rih.

Allianz Arena-a inkhelah Bayern tan Lewandowski chuan minute 54 leh 65-naah goal a khung a, tun hnaia khel ṭha tluang tak Arturo Vidal chuan an goal thumna khung bawkin Pep Guardiola naute hian a zawnin league match ngaah hnehna an chang zawn ta.

Poland international Lewandowski hian tun season Bundesliga khelh mekah goal 27 khung tawhin top scorer a mi mek a, inelna hrang hrangah goal 38 a khung tawh bawk.

Bayern lamin result ṭha an neih hi an khingpui Schalke tan erawh chhiatna a ni chiang a, league match hnuhnung vawi ngaah vawi khat chiah hnehna an chan theih avangin season thara Europe-a inlan an beiseina a thamral mek. Point 45 hmuin table-ah pasarihna dinhmun an luah.

Spanish manager Guardiola kaih-hruaina hnuaiah Bayern hian nomawi pa-thum chawi an inbeisei mek a, Cham-pions League semifinal lut tawhin Atletico Madrid nen an inhmachhawn ang. Karleh Thawhlehni zan hian German Cup semifinal khel dawn bawkin Werder Bremen an lo mikhual dawn a ni.

Bayern Munich coach Guardiola chuan a naute fakin, "Footballer ka lo nih ve tawh avangin Champions League khelh hnu nithum leka league match khelh zui a hautak zia ka hre chiang. Bul ṭan fuih lo mah ila inkhelh chawhnu lama ka naute chevel kha chuan min ti hlim tak zet. German Cup final luh kan tum a, Bremen nen kan inkhelh tur hi fiahna hautak a ni ang," tiin a sawi.