Real Madrid ban phakah La Liga nomawi

Champions League semi-final lut hlim Real Madrid-in La Liga champion nomawi beisei turin hmahruaitu Barcelona nena an inkar an sawr zim zel a, Inrinni zan khan an mikhualna ramah mikhual zak thei lo chan changin Getafe chu 5-1 in an sawp.

Real Madrid tan Getafe an hnehna inkhel hi league match sarih chhung a zawna an chakna a ni ta a, hmahruaitu Barcelona chu he chanchin buatsaih a nih lai hian point khat chiahin an phak lo tawh. Nizana inkhel Barca dinhmun a zirin an inthlauhna erawh danglam leh thei a ni.

Inkhel chu

Kum 2012 hnua league no-mawi la chawi leh lo Real Madrid tan first half-ah Karim Benzema leh Isco-te'n goal an khung a, chawlhlawka Madrid khaw club hmahruaina chu 2-0 a ni.

Second half ṭan aṭanga minute 50-na lek aṭangin Real-in Gareth Bale hmangin goal an khung chhunzawm a, goal dang erawh kan hmu lawk lo.

Hun tawp nan minute sarih chiah a awm tawh tihin Real forward hlui Pablo Sarabia chuan mualneitu team tan goal khat a khung ve leh a, mahse he goal hi Getafe tana beiseina siamsaktu ni loin Real chhaih kawlhna goal mai a ni.

Real Madrid tan James Ro-driguez leh Cristiano Ronaldo-te'n goal khat ve ve an khung leh a, an mikhualna ramah Real Madrid an chak chiang hle.

Ronaldo a ropui zel

Portuguese forward Ronal-do ropuina belhchhahin a awm zel a, tun season-a inelna hrang hrang a match 43 a inlanah goal 47 a khung tling ta der.

Tun season La Liga-a match zawng zawng la khel chhuak kim vek Ronaldo hian league bikah vawi 33 inlanin goal 31 a khung tawh a, amah hnaih bertu Barcelona forward Luis Suarez chuan vawi 29 inlanah goal 26 a khung thung.

Kum 26-a upa Gareth Bale-a'n league match 20-a inlanah goal 16 a khung tling ta bawk a, kum 2013-a khawvela player man to ber ni tura Real Madrid a pan hnua league match bika goal a khung hnem ber ṭum a ni.

France duh loh Benzema

Tun hnaia France-in Euro 2016 khel tura koh an tum loh thu an tihchian tak striker Karim Benzema pawhin a chet ṭhat a chhunzawm zel a, striker ṭha sawi tur nei tam lo France hruaitute tan khelmual chhungah zawhna a siam sak.

Kum 28-a upa striker hian Getafe laka goal a khung leh tak avang hian tun season-a league match 23 a khelhah goal 22 a khung tling ta der a, inelna hrang hrangah match 30 inlanin goal 26 a khung a - Euro 2016 khel lo tur chuan a uiawm hle.

Real Madrid coach Zinedine Zidane chuan, "Euro 2016 a khel dawn lo tih a hriat khan Benzema hi a lunghnur em em a, mahse professional a nihna ang takin khelmual chhungah a inlan a, team tan a pawimawh zia a lantir a ni," a ti.

French football legend chuan sawi chhunzawmin, "Zaninah goal khat khungin a ṭhiante thun tur vawi hnih a siamsak a, a thiltihah chiah a rilru a pe a ni," tiin a striker rilru hnualna chu team-in a tawrh loh thu a sawi.

Madrid coach Zidane chuan, "Kan tih tur dik takin kan ti a, nitinin champion nomawi kan hnaih zel a ni. Barcelona emaw Atletico Madrid chetsual hun tur ka hre lo a, a pawimawh ber chu kan game hmabaka chak zel hi a ni," tiin inkhel chungchang a sawi lang nghal.