Khatla chungah Tuikual South an awm

Tuikual South-in Mizoram Super League-ah a vawi khat nan Khatla TBL an hneh a, champion lai kut ata nomawi chhuhsak turin 'Phengphehlep' tan Thawhlehni zana MSL2 Finals Game 2 chak a tawk.

Zirtawpni zan final hmasa ber en turin Hawla Indoor Stadium leng lo mipui an pungkhawm a, Tuikual South-in state pawn player Rakesh hmang ṭangkaiin Khatla TBL chu 78-71 in an hneh. Champion lai chak lo lai hi stadium kawt zawlah basketball ngainatu ṭhahnem takin 'big screen' hmangin an en a - Mizoram Basketball Association inbuatsaihna ṭhat zarah stadium tet vanga buaina awm lo.

Mapuia OUT; Nelson IN

MSL2 semifinal-a Tuikual South leh Mission Veng Vikings inkhel boruak sang mah se final boruak erawh a nep thei lo. Final ṭan hmaa practice hnuhnung bera inhliam MVP nilai H. Laldinsanga chu MSL2 Finals-ah a inlan thei dawn lo.

MSL1 champion-na kawng--a player pawimawh Nel-son Lal--rohlua chu ni 365 hrem ni mah se phal a nih angin ni 180 hnuah an appeal a, MBBA disciplinary committee chuan hrem a tawh laia buaina a siam loh avangin Republic Veng tlangval hremna an hlip.

Nelson hi TBL-in ziak lut lo mah se MSL2 danin a phal angin Mapuia inhliam vangin squad-ah an ziak lut. Tuikual South forward Lalmawizuala erawh match thum hrem vangin a la inlan thei lo a, coach KC Lalliantluanga pawh match li chhung hremna a la hman zawh loh avangin technical area-ah a ṭhu thei lo. Mapuia inhliam vangin boruak a sang lo a, MVP nilai aia TBL-in Nelson an ziah luh dan chu dan ang thlap ni mah se Tuikual South leh hremna tawk mek tan hriatthiam a harsa.

Final hmuhnawm

Quarter hmasa berah state pawn player tel loin Khatla TBL leh Tuikual South an inlan a, Armed Veng tlangval Van-chuangpuia telna an chungnung zawk. Second quarter-ah Tuikual South-in an veng tlangval Rohlua hoin hmahruaina belhchhah zel mah se halftime hma minute 3 leh second 15-ah playoff chhiar tela MSL history-a dunk hmasa bera Rakesh a rawn inlar a, Haryana forwrd-in 35-28 a hmahruai mektu Phengphelep game kaltluang a tichhia.

Rakesh hian turnover vawi hnih a neih bakah air ball a nei hman a, TBL tana Gospel-a leh Vanlalmuana te an chetṭhat avangin champion laiin an lehthal hman. Amaherawhchu Haryana forward a vannei a, vawi thum turnover a nei dawn emaw tih hnuah referee-in foul a ham a, freethrow hmangin Tuikual South chu halftime hmahruaitu a nih pui ta zawk.

Tuikual South tan ChP-a hmuh-nawm mah se TBL trio Gospel, Vanlalmuana leh Nelson te an awm meuh chuan Phengphelep an ding zo lo a, second half-ah Khatla an chungnung zawk. Amaherawhchu quarter linaah Rakesh a rawn che ṭha chho a, TBL-in hmahruai mah se minute thum leh second 37 a awm tihin player hmuhnawm ber Dawrpui Vengthar tlangval Muana a inhliam. Hun pawimawhah TBL-in Mapuia an neih tawh bawk si loh avangin 68-65 a hmahruaitu Khatla dinhmun a chhe zawk.

Phengphehlep captain Dina'n hun tawp lamah point li ṭha bik a rawn nei a, a hunah tak Rakesh a rah bawk. State pawn player - Rakesh, defence ṭha, fitness ṭha, veng mipui, Muana inhliam leh TBL free throw chhe lutuk chu Tuikual South chakna chhanah a ngaih theih. Khalta TBL-in free throw vawi 33-ah vawi 10 chiah an luh laiin TKS-in vawi 35-ah vawi 21 an lut thung.

Inlehthalna?

SYS coach Khatla TBL-in an rawih Mapuia chuan, "Kan chak loh chhanah chuan chhuanlam kan nei lo. Game 2-ah tun aia ṭha zawka khelh kan tum ang. Kan lehthalna chance hi 50% aiin a ṭha zawk," tiin Tuikual South laka nomawi chan mai an tum loh thu a sawi.

Tuikual South coach KC Lalliantluanga chuan, "Hun tawp lamah khan Mapuia chu awm se inkhel a rawn thlak danglam thei dawn a, Vanlalmuana inhliam kha kan vanneih pui bawk. Chutihrualin kan player-te an khel ṭha a, Rakesh khan Aizawl a rawn thlen tlaia a inlan nghal avangin a theihna tak kan la hmu lo. Game hnih dang a la awm avangin Rakesh kha hman ṭangkai kan tum a, tun ṭuma khan chhiatpui pawh pawisa loin kan hmang lui a, kan vanneih pui ta a ni," tiin Vanglaini palai a hrilh.

MSL2 Finals Game 2 hi April 19, Thawhlehni zanah khelh a ni dawn. Khatla TBL-in an theih phawt chuan India captain Vishesh Bhriguvanshi leh Pratham Singh te chah chhoh an tum ang.