Rashford-a'n Villa a pet chhuak

Kum 18-a upa Marcus Rashford-a'n Inrinni zan khan Aston Villa lamah goal a khung a, kum 119-a upa club Villans chu kum 1987 hnua a vawi khat nan English league sang ber aṭangin an relegate.

Villa mangṭha le

Aston Villa hi English club zinga record nei ṭha ber zinga mi an ni a, first division (top flight) leh FA Cup-ah vawi sarih ve ve champion tawhin League Cup-ah vawi nga an champion tawh. European Cup leh European Super Cup-ah vawi khat ve ve an champion tawh bakah Intertoto Cup-ah vawi hnih an champion tawh bawk.

Kum 10 chhung en let pawhin Vilans hi team chhia an ni ngai lo a, he club hi player ṭha tak tak Gareth Barry, Stewart Downing, Fabian Delph, Stephen Ireland, Darren Bent, Ashley Young, James Milner, Ron Vlaar, Christian Benteke, Shay Given leh Joe Cole te khelh tawh ṭhinna niin relegate tura beisei an ni ngai lo. Amaherawhchu tun season-ah pound maktaduai 50 dawn hmang mah se Premier League an inham tang zo lo.

Villa hian manager Tim Sherwood hoin bul an ṭan a, an dinhmun ṭhat loh avangin French manager Remi Garde an la lut a, ni 147 a enkawl chhungin Garde hian match 23-ah vawi thum chiah a chak pui a. Tuna enkawl lai lawktu chu Eric Black a ni.

Rashford-a goal

Manchester United tan captain Wayne Rooney-a'n inkhel bul ṭan mah se inkhelh banah chakna goal khungtu Rashford a langsar ber. English rawlthar hian United tana match 12 a khelh aṭangin goal sarih a khung a, Rashford hian goal bakah a chevel hmangin player ṭha zel tura beiseiawm a ni tih a lantir.

Old Trafford-ah United-in hun rei zawk inkhel an thunun a, amah-erawhchu goal khat chauh an khung theih avangin Villa-in striker Rudy Gestede an luhtir hnuah an talbuai a, vannei taka point khat hlawh chhuak-tu Red Devils-in Champions League beiseina an la nei ve zel.

Beisei nei Villa

Villa enkawl lailawktu Black chuan, "Premier League hi player, supporter leh fan zawng zawng tel duhna a ni. Mi tam takin Villa hian Premier League an khelh leh ngei an beisei a, kei ngei pawhin ka ring tlat a ni. Premier League kan khelh leh ngei theih nan tun aṭangin hma kan lak nghal a ṭul a ni," tiin a sawi.

Premier League ṭan hnuah team 67 an relegate tawh a, chung zinga 18 chauh chu top flight-ah an let leh a, Villa hmabak hi a awlsam dawn lo.

Aguero hattrick

Argentine striker Sergio Aguero chuan Stamford Bridge-ah hattrick a siam a, Manchester City-in Chelsea 3-0 in an sawp.

Champions League semifinal-a Real Madrid hmachhawn tur City hian Aguero hmangin minute 33-naah hma an hruai a, Argentine striker goal khung tur siamsaktu hi Chelsea duh loh Kevin de Bryune a ni. Minute 78-naah Fernandinho tih tluk vangin Thibaut Courtois chu hnawhchhuah a ni a, Aguero-a'n penalty chu hattrick siam nan a hmang.

Season thara coach thar nei tur Chelsea-in team ṭha zia an chhuah lo a, City erawh season thara Champions League khel turin an dinhmun an sawhnghet chho zel thung.

Man City manager Manuel Pelle-grini chuan, "FA Cup aṭanga min petchhuaktu an nih avangin phuba lak kan duh a, helai hmunah hian player naupang kan chhawr avangin kan hneh lo. Tunah erawh team kimin kan kal a, kan goal nawr dan leh goal kan ven dan a lungawi thlak hle," tiin chak an phu zawk thu a sawi.