Nagaland CM-in inthlan boycott lo turin ENPO a ngen

Nagaland khawchhak lama Frontier Nagaland Territory ngiata lungawi lohna lantir mek, ENPO chuan rorelna hran pek an nih loh chuan Lok Sabha leh state chhung inthlan eng pawh boycott an tum thu an sawi hnuin, Nagaland chief minister, Neiphiu Rio chuan ENPO chu an thutlukna ngaihtuah ṭha leh tura a duh thu a sawi. Chief Minister hian People’s Democratic Alliance’s (PDA) candidate puanna hun an hmannaa thu a sawinaah he thu hi a sawi lang a ni.

CM Rio chuan inthlan boycott tumna chu sut leh tura a duh thu sawiin, Frontier Nagaland ngiat chungchang pawh dawhkân khat kila inlungrual taka sawiho ngai a nih thu a sawi bawk. Rio chuan eastern Nagaland MLA 20 an awm kim veleh Nagaland cabinet chu an ṭhut khawm tur thu leh, Nagaland khawchhak lama chengte lungawi lohna chu an ngaihtuah tur thu a sawi a ni.

ENPO leh Nagaland sorkar chuan inbiakna an neih a ngai niin Rio chuan a sawi bawk. Mipuite tana ṭha ber tur sawiho a nih theih nan ENPO chu sorkar nena inbiakna nei turin a sawm a ni. Rio chuan state hran ni loin autonomous body nei tura inremna an siam theih a ring a, mahse, chumi nei tur chuan inbiakremna neih phawt a ngai a niin a sawi.

Nagaland khawchhak lama chengte'n ngaihthah leh hmasawnna mumal an nei lo nia an hriatna chungchangah Rio chuan hmalak an tum thu a sawi. Hmasawnna thlen turin tihtur panga an ruahman a, chungte chu; ziak leh chhiar thiam an tam theih nana ṭan lak, hriselna lama hmasawnna ruhrel tihhmasawn, mimal sum lak luh tih pun, sorkar hna leh zirna in sang zawka lut an tam theih nana reservation siam leh hmasawnna inkhuang rual lo chungchanga hmalak te an nih thu Rio chuan a sawi bawk.