Medal pakua hlawh chhuak thei Mizoram Taekwondo Team

Norh East Olympic Games khelh laiah Mizoram taekwondo team an che ṭha hle a, medal pakua tehmeuh an hlawh chhuak. Medal an lak zinga pathum chu gold niin silver medal pali leh bronze medal pahnih a tel bawk.

Tun inelna neih laiah Mizoram hian taekwondo khel thiam infiammi 13 a tir chhuak, an zinga pariat chu mipa niin hmeichhia panga an tel bawk a ni.

Lalrinngheti Sailo chuan Nagaland mi N. Mataloueibi (2-0) leh Assam aiawhtu Naya Chetia 2-1 te a hneh hnuah final a lut a, mahse gold medal inchuhnaah Salam Charlie Devi lakah 2-0 a chak loin silver medal-ah a lungawi a ngai.

Vanlalthlamuanpuii pawh final-ah a vanduai, a khingpui Nagaland player Mallika Baruah lakah a chak lo, final kalkawngahn hian first round-ah bye-in a hnuah Manipur infiammi Kharibam Chanchan Devi chu 2-1 in a hneh.

Mipa inlena lamah H. Lalrinfela chuan Whilson Pradhan (Sikkim) leh Bengia Tapum (AP) te chu 2-0 ve vein a hneh a, champion beiseina sang viau mah se Y Chandrakumar (Nagaland) lakah 2-0 in a chak lo, silver medal erawh a la tho.

Lalhmingsanga pawhin Heutingyi (Nagaland) leh Pesen Romin (AP) te 2-0 vawkin a hneh a, final-ah bawk Pangngambam Bope (Manipur) chu 2-0 a hneh loin silver medal a hlawh chhuak.

B. Malsawmzuala chu round hmasa berah a bye avangin semifinal a lut nghal a, mahse semifinal-ah hian Ankur (Nagaland) chu 2-0 in a hneh lo - Mizoram tan bronze medal chu a la ta tho a ni.

Under 80 kg huangah Vanlalmawipuia Venghnuaiin gold la turin Manipur leh Sikkim aiawh a hneh hnuah final-ah Keineilevo Nagi (Nagaland) 2-0 in a hneh.

Samuel Lalnunmawia, Thenzawl, (under 58kg) pawhin Jitendra Limbu (Sikkim) 15-4, 11-0 leh Manipur player ṭha Yekpam Akash Sing 23-16,16-5 in a hneh a, final-ah Anikey Misu (Arunachal Pradesh) chu 3-1 a hnehin a champion. Under 68kg-ah Zoramsanga, Ramthar chuan bronze medal a la bawk.

Hmeichhia under 49 a khel, R. Lalbiaknuami'n Sapam Nancy Devi (Manipur) leh Nyalin Basar (Arunachal Pradesh) te a hneh hnuah a thlengtu Nagaland hneh lehin gold medal a la bawk.

Mizoram Amateur Taekwondo Association (MATA) general secretary Joseph Thansanga chuan, "Inelna hmachhawn tur hian kan inbuatsaih ṭha hle a, kan inbuatsaih ang taka kan khelh avangin medal pawh kan hlawh chhuak thei a ni.

"Medal la ve chiah lote pawh an vanduai vang chauh a ni. Tun ṭumah hian infiammi kan tirhte hi naupang deuh zawk, hma hun eng tak neite an ni, chuti chunga kan hlawhtling thei hi a lawmawm takzet," tiin Vanglaini a hrilh.