NE Olympic Games-ah football final duhthusam
Tlai dar 2:00-ah Mizoram Vs Manipur
3rd North East Olympic Games football final-ah Mizoram leh Manipur te an inkhel dawn. Nimin lamah inelna zawh fel a ni tawh a, football final chiah a awm tawh dawn avangin vawiin chawhnu dar 2:00-a inkhel tur hi boruak a hot sawt ang.
Manipur hian final thleng turin inelna thlengtu Nagaland chu nimin khan 2-1 in an lehthal a, Mizoram pawhin Santosh Trophy final round thlengtu Arunachal Pradesh chu 2-0 in an hneh bawk. Group stage-ah Mizoram hian 4-0 in an hneh tawh a, final-ah hneh nawn an tum dawn a ni.
Manipur-ah Santhoi
Manipur-in NE Olympic an la thutak tih a chiang a, Santosh Trophy-a an squad tho an tir a tih theih. Chutihrualin coach erawh an thlak a, Thangjam Saran Singh aiah K. Ratan Singh an hmang ta thung.
Group match hmasa bera Manipur-in Mizoram an hneh loh ṭumin Santosh Trophy-a an player pawimawh ber Phijam Sanathoi an chhawr thei lo a, India U23 probables squad-a an koh vang a ni.
Mahse, Manipur hian Sanathoi hi squad-ah an ziaklut a, Under 23-ah an koh tak loh avangin Nagaland a pan nghal. Semfinal-ah Sanathoi a rawn inlan a, danglamna thlentu a ni nghal.
Nagaland-in Neisede hmangin minute 21-naah khung hmasa mah se Manipur-in Sanathoi-a goal hnih hmangin an lehthal a, goal ṭha tak ve ve a ni. Group stage-a mualpho Manipur-in final an thleng a, gold medal beiseina an nei thar ta bawk.
Mizoram khel a nghet
Mizoramin Manipur 4-0 a an sawp hnuin Assam 3-2 in an hneh a, match hnihnaah lawm a kim lo - goal hnih an chhuah. Semifinal-ah Mizoram an insiamṭha a, goal an chhuah tawh lo.
Mizoram khingpui Arunachal Pradesh hi Santosh Trophy thleng zo hlim an nih avangi nan fitness a ṭha a, inkhel thunun lai pawh an nei hial. Mahse, Malsawmfela telna Mizoram hneh tur khawpin an ṭha tawk lo.
Sawmfela fing zet Isak Malsawmkima'n a khung thei lo a, Vanlalthanga leh Sawmfela te pawhin an khung thei bik lo. Mizoram defender Ramngaihsanga'n corner kick aṭanga ball kal a tauh lut a, 1-0 in minute 35-naah hma an hruai.
Second half-ah Sawmfela danglamna a lang leh a, a hnathawh ṭhat chu R. Malsawmtluanga'n hmang ṭangkaiin minute 90-naah chak nemnghetna goal a khung. Mizoramin Arunachal Pradesh 2-0 in an hneh a, match thum an khelh tawhah an la chak vek.
A hmuhnawm dawn
North East Olympic Games-a an inkhelhna thlir chuan Mizoram hi awlsam taka chak nawn tur an ni a, amaherawhchu Santosh Trophy-ah Manipur hian 4-1 in hnehna an chang.
Football tehna aṭanga thlira inelna lian zawkah Manipur an chak a, Manipur laka Mizoram an chungnung ngei a ni tih fiah nan Lalbiaksanga Colney kaihhruai Mizoram an chak nawn a ṭul.
Mizoram coach BS-a Colney chuan, "Pathian zarah kan lungrualna a ṭha a, kan khelh danah pawh kan lawm. Chutihrualin Nagaland hei chaw hel hi pawi an ti lo a, kan thil ei hel hret hi kan tuar. Kan pum a nawm loh avangin semifinal-ah pawh khelh kan harsat. Final bikah chuan ka chawi ei leh chaw ei hun pawh an siam danglam hret theih kan beisei. Mizoram tan gold medal hlawhchhuah ngei kan tum," tiin Vanglaini a hrilh.
Mizoram team hi Mizoram Police behchhaha din an ni a, MPL10 champion team an nih miau avangin kum tluana khel ho an ni a, an inhre ṭha tlang hle. MPL-a Police tana khel lo player pathum centre back Ramngaihsanga bakah winger Vanlalthanga leh Isaak Malsawmkima ten an belh a, coach BS-a hnuaiah harsatna nei loin an insiamrem theiah a ngaih theih.