Lawmawma leh Naom-i ten gold an la

3rd NorthEast Olympic Games 2024-ah Mizoram tan Lallawmawma leh Naom Chingsannuam ten gold an hnek chhuak. Nizan khan Malsawmtluanga leh C. Lalduhawma ten final an khel a, result kan hre hman lo thung. Mizoramin boxing-ah hian hriat theih chinah gold leh silver pahnih ve ve bakah bronze pasarih a la a ni.

Mizoram hian category parukah final an lut a, Lightweight (57-60kg) final-ah Tuipui boxer Lallawmawma'n Arunachal boxer Rikam Lapung a hneh. Hmeichhe lamah bantamweight (52-54kg)-ah Naom Chingsannuam-i'n gold a hnek chhuak bawk a, Chaltlang nula Naomi hian inelna thlengtu Nagaland boxer Jamuna a hneh ve bawk.

Light Welterweight (60-63.5kg) final-ah Venghlui boxer Lalkhawngaiha chu Manipur boxer Chinglemba Moirangthem lakah a vanduai a. Hmeichhe lamah TC Lalremruati chuan Lightweight (57-60kg) final-ah Nagaland boxer Preeti a hneh lo.

MIZBA-in tun ṭum inelnaah hian boxer 17 a tir a, medal la pali an awm. Mi pasarihin bronze medal an la a, mipa-ah K. Vanlalhriatchhunga, Abednago VL Dinpuia, Frankie H. Vanlalruatpuia leh Malsawmkima te an ni a, hmeichhe lamah Vanlalrinngheti, Rudy Lalhmingmuani leh Abisak Vanlalmawii te an ni.

Meghalaya-a NE Olympic Games neih a nih ṭum khan Mizoramin boxer 17 an tir a, medal 16 an hawn. Boxing-ah Mizoramin gold panga, silver pasarih leh bronze pali an la. Kuminah erawh Lunglei Electric Veng tlangval Malsawmtluanga leh Bethlehem Vengthlang tlangval C. Lalduhawma ten gold an hnek chhuak a nih pawhin gold pali chauh an la dawn tihna a ni a, boxing-ah Mizoramin inelna hnuhnung ber an tluk pha lo.