Basketball-ah final lut

Mizoram mipa basketball team chuan nimin tlai khan Manipur chu 84-44 a sawpin North East Olympic Games 2024 neih laiah final an lut.

Nizan khan semifinal hnuhnung zawkah inelna thlengtu Nagaland leh Assam an inkhel a, result kan hre hman lo. A chak zawk leh Mizoram hian vawiinah final an khel chhunzawm nghal dawn a ni.

Nimin tlai inkhelah Mizoram hian bul an ṭan fuh a, basket nei hmasa zawkin hnufual lai an nei lo. Mahse, Manipur lamin an thlahfal duh bik lo, quarter khatna tawp lamah erawh point 10 vel laiin an kal fal chho thei a ni.

Quarter hnihna a zawh meuh chuan Mizoram hian 66-28 in hma an hruai, chawlhlawk laia an san falna hi point 38 ngawt a nih avangin chak tur a chiang a, inkhel chawhnu lamah pawh talbuai loin an chak tlang.

Lalruatfela (Afela) enkawl Mizoram team hian an match hmasa lamah Meghalaya (88-39), Assam (75-63) leh Tripura (78-27) te an sawp vek a, final lut tur hian harsatna lian tham an tawk lo.