Afghanistan laka goal khung lo India
FIFA World Cup 2026 qualification (AFC) ah India-in beisei an phak lo - Ningani zan khan an mikhualna ramah Afghanistan nen an inkhel a, fan-ten hnehna chang ngei tura an beisei laiin Blue Tigers an chak zo lo a, 0-0 in an inhnehtawk.
India tan squad-a Mizo awm pahnih, Lallianzuala Chhangte leh Lalengmawia Ralte ten inkhel bul an ṭan ve ve a, Mumbai City player pawimawh pahnih hian an team tan danglamna erawh an thlen thei bik lo.
March 26, Thawhlehni zanah India hian Afghanistan an mikhual ve thung dawn a, Blue Tigers hian hnehna an chang zo lo a nih chuan dem an hlawh lehzual ang a, coach Igor Stimac-a'n ban duhtu a ngah lehzual ang.
Chance hloh
Saudi Arabia-a inkhelah India-in goal khung ngei tumin an nawr a, Afghanistan lamin an tharum neih chhawr ṭangkai an tum thung - he team hi Bengaluru coach hlawhtling Ashley Westwood-a enkawl an ni a, ani hian Indian player a hrechiang.
Manvir Singh-a chet ṭhat zan a ni lo a, Mohun Bagan forward hian Lianzuala siamsak vawi hnih ngawt chu goal-ah a chantir thei lo a, Nikhil Poojary siamsak a khung loh pawh uiawm a tling.
Vikram Partap Singh chuan a vawi khat nan India jersey hain bul a ṭan a, mahse, ISL season duhawm tak hmangtu hian a chance neihte goal-ah a chantir thei lo. Stimac-a'n second half-ah goal khung ngei duhin Liston Colaco, Mahesh Naorem leh Deepak Tangri te a luhtir a, danglamna an keng tel lo.
Afghan an ṭha?
India tan Afghanistan hi 'hneh sa' anga ngaih an ni ṭhin a, mahse, Ningani zanah India-in goal khung an harsat tlat. Afghanistan tan Indonesian second division club PSPS Riau attacking midfielder Omid Popalzay leh Finnish club HIFK winger Mosawer Ahadi ten chance an nei ve a, an chhawr lo.
Afghanistan hian India an tawn hmain qualifier match hnih an khel a, Qatar lakah 8-1 ngawtin an mualpho a, Kuwait chuan 4-0 in an sawp bawk - Kuwait hi India chuan 1-0 in khualmualah an lo hneh tawh a, Afghanistan laka point thum hlawhchhuah loh hi India tan result chhia a ni.
Stimac chuan, "Vawi li, vawi thum vel chu chance duhawm kan nei a, mahse, kan khung theih miau loh avangin kan tan chuan result ṭha lo a ni. Hun rei tak chhung chu goal khung hi kan harsat ta," a ti.
A har a ni
Lianzuala chuan, "A tira kan chance neihte kan chhawr lo kha a uiawm a, kha khan min tihnual ve deuh niin ka hria. Kan inkhelhna hmun hi a harsa ve bawk a, thawk lak a har ṭalh mai," tiin Vanglaini a hrilh.
Afghanistan ram a buai avangin an ramah inkhel an thleng thei lo a, an ram sik leh sa nena inmil ber tura ngaih Damac Stadium, Khamis Mushait, Saudi Arabia chu an home atan thlan a ni - sea level aṭangin 2,470 metres a ni a, a boruak a dang.
Lianzuala chuan, "A lehpekah chuan tun aiin kan ṭha ang," a ti a, India ramah chak a beisei. Stimac chuan, "Tlarhnung kan khel ṭha a, tlarhmaah awlsam taka tih tur kan ti lo fo. Chu chuan min tilawm lo a ni. Passing, attack leh chance siamah hma kan sawn a ngai a, mual sir aṭanga ball cross kan chhawr thiam a ngai," a ti a, hmasawnna tur tam tak a awm thu a sawi.