Ram paruk chiah an bang ta

European Championship khel turin ram pathum tan hmun ruak a la awm, playoff khelh laiah team paruk chauh an dam ta - playoff final chiah hmabak an ni tawh a, match khat chak lekah Euro 2024 an khel thei tawh dawn tihna a ni.

Ukraine chuan Iceland chu Wroclaw-ah an hmachhawn dawn; Georgia chuan an ramah Greece an mikhual ang a; Poland erawhin khualmualah Wales an zin chilh thung dawn a ni, thi leh thau pawlha an beih ngei a rinawm.

Ningani zan playoff semifinal inkhelah Ukraine chuan hun tawp hma minute nga chauh awm tawhah Roman Yaremchuk hmangin si phurh an sut a, a hnu lawkah Artem Dovbyk chuan goal khung lehin Bosnia and Herzegovina chu 2-1 in an hneh.

Inkhel dangah Georgia chuan besei phak bakah qualifying khel ṭha Luxembourg chu 2-0 in an hneh. Georgia hian Euro an la khel phak ngai lo, tunah chuan an ban phak maiah a awm ṭan, tournament tak khel tur erawhin Greece an paltlang leh phawt a la ngai dawn.

Path A semifinal lamah Wales chuan an mikhual Finland chu 4-1 in an sawp. An hmabak chu Poland an ni dawn a, an intawnna tur hi Cardiff City Stadium a nih dawn avangin mipui puihna dawng chungin Germany pan theihna ticket neih ngei an beisei sang khawp ang.

Wales manager Robert Page chuan, "Tun hma pawhin hetiang chi boruak hi chu kan lo tawng tawh. Tun ṭumah hian player kan neih ṭhat an dam kim a, chuvangin chak ngei turin beiseina pawh kan nei sang hle," tiin a sawi.

Wales khingpui tur Poland hian semifinal-ah Estonia chu 5-1 in an sawp, an striker ṭha leh captain Robert Lewandowski chu goal khungtu zingah a tel lo. Barcelona hmatawng ni lo pawh goal khung thiam an ngah tihna a ni - Wales tan fimkhur a ngai khawp ang.