Chhuah tumna nei lo Verstappen

Formula 1 champion lai Max Verstappen chuan Red Bull tana contarct a neih lai chu tihtawp tumna a nei lo a, car intlansiakna sang berah hian tun dinhmunah chuan a team thlak a tum lem lo.

Intlansiakna pawn lamah Red Bull thuneitu leh Max-a hringtu, a pa thu a inhmu lo, hemi chungchangah hian Dutch tlangval hi a pa lamah ṭangin dik lohna a neih lo thu vantlang hriatah a sawi chhuak tawh a ni.

Red Bull lamin an hotupa Christian Horner chu an puhnaah a fihlim niin an sawi ve thung. Horner hian a thawhpui hmeichhia chu mipat hmeichhiatna lam rawngkaiin mawi lo takin a chet khum niin an puh.

Kum 26 mi Verstappen chuan, "Inremna kan nei a, fel taka ziah a ni. Chumi bak chu sawi theih ka nei lo, kan inremna hi hman zawh ka tum," tiin a hma hun an zawhna a chhang a, a contract neih lai hi kum 2028 thleng niin a hnu lam zel erawh a sawi thei rih lo.

Red Bull driver Verstappen hian tun hnai season thum chhung chu F1 a thunun viau a, kuminah pawh intlansiak vawi hnih an hmachhawn tawhah a chak ve ve, a chesual viau a nih ngawt loh chuan a nomawi kawl lai a humhim leh ngei pawh a rinawm.

Pathianni chawhma dar 9:30 hian Melbourne Grand Prix Circuit-ah Australian Grand Prix an tlan dawn a ni.