Wrestling-ah Mizoramin gold pali an la

Mizoram Wrestling Asso-ciation-in NorthEast Olympic atan inpuahchahna ṭha an nei a, free style leh belt wrestling-ah gold pahnih ve ve lain tun inelnaa Mizoram tana medal la tam ber an ni.

Wrestling-ah ringawt Mizoram hian medal 13 an hlawh chhuak a, medal tally-ah Mizoram dinhmun an ti ṭha. Wrestling (free style)-ah B. Lalawmpuia leh Remruatpuia ten gold an la a, belt wrestling-ah Elizabeth Rohlupuii leh Penticos Lawmsangpuii ten gold an la bawk.

Lalrinfeli'n inelna pahnihah hian silver medal a hlawh chhuak ve ve. Mizoram hian bronze medal pasarih an la a, Meghalaya-a inelna neih ṭum aiin an che ṭha zawk.

Mizoram Wrestling Association president Ngurthansanga chuan, "Association hrang hrangah inbuatsaihna nei ṭha ber kan nih hial ka ring. Selection fair takin kan kalpui a, NE Olympic inpuahchahna atan nuai hnih kan dah. Selection neih hnuah camp kan buatsaih chhunzawm a, discipline ṭha taka keng kawhin devotion nen hun kan hmang ṭhin," tiin Vanglaini hrilh.

MWA hian Wrestling Hall, Ramhlun Sport Complex-ah camp hi an buatsaih a, an theih ang tawka ei leh in ṭha pein hma an la an ni. Tun ṭuma Mizoram team hi coach H.Lalhmingmawii NIS, Kolasib leh Zorelliana, E.Lungdar bakah manager C. Lianzuala, Tachhip ten an ho a ni.

Wrestling hi National Games thlenga Mizoramin medal a beiseina a ni a, MWA president Ngurthansanga chuan, "National lama medal lak nana kan hman ber leh wrestler ṭha kan chherchhuahna ber, SAI chu kum 2019 khan min tihtawpsak. Kan hostel naupang awm sa te pawh an hrilhhai hle. Tuna kan Sports Minister hian Assam SAI enkawlna hnuaiah hma min lakpui mek niin kan hria a, SAI hi kan nei let vat thei a nih chuan mational mai bakah Olympic thleng pawha beisei theih a ni," tiin Vanglaini a hrilh.