Aw Venghlun, Sihphira mi Aizawl District khuate zingah i te ber tawp lo e!

Zirtawpni zan a ni a, zan dar 11:30 vel a ri tawh a, Aizawl khawpuia cheng mi tam tak tan mut hun a ni tawh. Mahse, Rajiv Gandhi Stadium, Mualpuiah erawh thawm a bengchheng takzet a, Sihphir Venghlun a reh bik lo.

A chhan maw? Mahindra XUV3OO LPS Cup final-ah Sihphir Venghlun an champion a, an veng chanchina a vawi khat nan inter-village football nomawi an chawi tlat alawm - tuin nge maw dem thei ang le?

Zirtawpni zana inkhel hmuhnawm bikah Sihphir Venghlun hian Kawnpui Jt. an hmachhawn a, hun pangngaiah team pahnih hi 1-1 in an inhnehtawk. Kawnpui tana Lalrintluanga goal khung chu Sihphirin Lalmuanpuia hmangin an chhanglet a, 1-1 in inkhel a tawp.

Minute 30 dang khelh a nih hnuah pawh goal dang a lut lo a, penalty hmangin chak zawk zawn a ni. Sihphir Venghlun keeper Zoliansanga'n vawi hnih ngawt penalty a dang a, 4-1 in a team hi champion nomawi a chawipui.

Sihphir Venghlun hi nikum khan D. Buanga & Sons Inter Village Futsal Tournament-ah an champion a, 2022-23 season khan Aizawl DFA First Division-ah an champion bawk. An record thlirin tun dinhmunah football leh futsal thiam ber veng/khua an ni.

A hmuhnawm

Inkhel ṭantir aṭangin team pahnihin chak an tum tih an pholang a, mipuiin an ṭawiawm ṭhat bawk avangin RG Stadium-a inkhel hi boruak a nung nghal hle - minute lina lekah Kawnpui player C. Zomuanpuia chetsual zarah Joseph Lalṭhafela'n chance a nei nghal a, mahse, a chhawr thei lo.

Hun rei a liam hman lo. Sihphir tan Malsawmtluanga ball pek ṭha lutuk chu Ricky Lalramnghaka'n a um lut a, mahse, an lo tibuai hman - corner pet a ni a, Sihphir tana goal ruk khungtu Ricky-a bawkin chance nei mah se, a thlawh over.

Kawnpuiin an nawr let zui - Kanwpui tan Lalrintluanga'n khungna remchang nei mah se hun a duh rei hret a, a 'shot' hman lo. Sihphir tan Ricky-a bawkin minute 27-naah chance a nei a, hnai tak aṭangin a khung thei lo a, a vanneih zan a ni lo.

Sihphir bawk hian minute 35-naah Lalmuansanga hmangin chance an nei a, mahse, Malsawmtluanga ball pek ṭha lutuk chu a thlawh over luah - Kawnpui tan Laldinsanga'n ṭha zeta ball a lakluh hnuah a chance neih a khawhral bawk.

Kawnpui an tal na

Sihphirin first half an thunun tiin a sawi theih a, chawlhlawk hman zawh a nih hnuah erawh Kawnpui an tal na sawt - Sihphir lakah goal khung ngei tumin an nawr zui a, tawnhriat nei ṭha Albert Zohmingmawia hmuh tur a tam sawt.

Aizawl FC forward hlui hian Sihphir tlarhnung tan hna siam ṭhin mah se, chance mumal erawh a insiam hleithei bik lo a, Kawnpui tana Lalengmawia freekick pet, uiawm taka lut ta lote leh Lalkrossmawia chance chhawr lohte chu Kawnpuiin an thlir let ang a, an ui vawng vawng ang.

Minute 87-na a ni a, Kawnpuiin goal an khung ta nge nge. Sihphir tihsual zarah Albert-a'n chak takin ball a tlan luhpui a, Lalrintluanga tana duhthusamin ball ṭha bik a pe - Rintluanga hian Sihphir keeper Zoliansanga a pet khum a, goal-ah a chantir.

Kawnpui thawm a ring a, chak tur angah an inngai hman. Kawnpui coach tawnhriat nei ṭha K. Malsawmkima'n player khel ṭha Albert-a a la chhuak zui a, Kawnpui tlangval chhuah hnuah Sihphirin Kawnpui an ngam sawt a, goal khung ngei an tum.

Beidawng ve lo Sihphir

Hun pek belh minute thumna a ni a, Sihphirin corner an hmu. Striker Ricky-a pet chu Muanpuia'n a tauh lut - Kawnpui defender-ten an tih tur an ti tawk lo a, goal an chhuah ho hret tiin a sawi theih.

Kawnpui coach Mala chuan, "Albert-a ka lakchhuah chhan kha a malpui na a tih vang a ni a, engemaw chen kha chu a khel lui tawh zawk. Hun a tam tawh lo a, kan goal kha kan hum theih mai beisei chungin ka la chhuak. Ho lutukin corner aṭangin goal kan chhuah leh ta si a ni," tiin inkhelh zawhah Vanglaini a hrilh.

Extra time-ah Kawnpui aiin Sihphir an huai tawh zawk - Muanpuia'n chance ṭha dang nei leh mah se goal-ah a chantir thei lo a, penalty hmangin chak zawk zawn a ni. Kawnpui tan striker Mawitea leh C. Zomuanpuia te lo pen chhuak hmasain Sihphir keeper Zoliansanga'n a dansak ve ve!

Lalengmawia chu Kawnpui tana chhuih lut awmchhun niin, Malsawmtluanga, Roneihsanga, Lalramluaha leh Ricky Lalramnghaka ten Sihphir Venghlun tan an khung vek thung a, 4-1 a hnehna changin champion nomawi an hawn.