Basketball champion Mizoram

North East Olympic Games 2024 neih zawh takah Mizoram mipa basketball team an champion. Lalruatfela (Afela) kaihhruai team hian gold medal inchuhna inkhelah Assam chu 82-78 in an hneh.

Mizoram hian final kalkawngah harsatna an tawk lo. An khingpui Meghalaya (88-39), Assam (75-63) leh Tripura (78-27) ten an hneh a, semifinal-ah Manipur chu 84-44 in an sawp bawk a, harsa vak loin final an lut.

Inrinni chawhnu lama final inkhelah Mizoram hian hnufual em em lai nei lo mah se an kal fal hleithei bik lo, a tawp hun pawimawhah erawh Mizoram hian a zawna basket neiin an kal fal - Assam lamin second 20 awm tling tawh loah time out lain lehthal tum viau mah se an tho chhuak zo lo.

Mizoram coach Afela chuan, "Mizoram Super League kan nei a, hei vang hian tualchhungah basketball inelna nung ṭha tak kan nei. Player ten training an nei ṭhain kawng engkimah state dangte hmaah kan kal tiin a sawi theih ang.

"Kan inbuatsaihna a ṭhat ṭhin avangin kan tumpui dangte hian min en dang a danglam ve a, an theihna ang tak pawhin an khel chhuak ṭhin lo. Chu tak chu keini tan vanneihna a ni thung," tiin Vanglaini a hrilh.

North East Olympic Games hi vawi thum neih a ni tawh a, a hmasa berah basketball telh a ni lo. A hnu vawi hnih an telh tawh chinah chuan Mizoram hian nomawi an chawi ve ve, hmarchhak tlangval zingah Mizo aia basketball thiam an awm lo tihna a ni.

Mizoram Basketball Association leh Zonet te ṭangkawp chuan MSL an buatsaih ṭhin, kuminah pawh a season kuana an khel zo tawh. MSL aṭangin player ṭha tam tak an rawn inchher chhuak a, a ṭha sate an in chher hriam bawk, chu chuan rah ṭha a chhuah tih a lang.