Verstappen buai niah Sainz a chak

Max Verstappen pawh mihring ve tho a ni a, a chak char char thei ngawt bik lo. Nimina tlan zawh tak Australian Grand Prix-ah Red Bull driver hi a tlan tluan ve thei lo a, tun season intlansiak hmasa pathuma chak vek a tumna chu a thlawn.

Melbourne Grand Prix Circuit-ah hliam dam hlim Carlos Sainz a tlan chak ber. Sainz ang bawka Ferrari car khalhtu Charles Leclerc chu pahnihnaah thlengin - Australia ram chu Italian team hlunte hlawhtlinna hmunah a chang.

Lap lina an tlan laiin Verstappen-a car chu a khu chiam a, endik turin pit lane lamah a lut. Intlansiak chhunzawm leh theih beiseina nei mah se an duh angin thil a kal vek bik lo - Dutch tlangval leh Red Bull team tan hun duhawm lo a inher chhuak.

Sainz-a tan erawh hun duhawm a ni ve thung, a rilphir zai vangin Ferrari driver hi intlansiak hmasa lamah a inlan thei lo. An zai aṭanga ni 16 chauh a liam tihin F1 huangah a lo kir a, kir satliah ni loin hnehna a chang leh nghal a ni.

Kum 29 mi Sainz chuan, "Ka lawmna hi thuin ka sawifiah thiam lo a, a hlut dan a danglam hle - midang pawhin min hriatthiampui phak ka ring lo. Ka tan chuan season harsa tak a ni dawn niin ka hre hman, mahse hun rei lote chhunga danglamna lo thleng hi a mak.

"Team lamin min thlawp ṭha em em a, ka mamawh leh hnehna ka chan theihna tura pawimawh zawng zawng min chhawpsak," tiin a tlan dan leh a team chet danah a lungawi tih a sawi a, a hma lamah beiseina a nei sang hle bawk.

Nimin chawhma lama intlansiak Australian Grand Prix hi a hmunah mi 132,106 laiin an en a, entu an tam ber ṭum a ni. Kar tawp tlan chhinna zawng zawng nena mipui pungkhawm hi 452,055 tehmeuh an tling a ni.