Liverpool, Real leh Bayern ten Alonso duh

Bayern Munich honorary president Uli Hoeness chuan Bayer Leverkusen boss Xabi Alonso lakluh an duh thu a sawi a, hetihrual hian Liverpool leh Real Madrid-in an dawr ve avangin an tan a awlsam dawn lo, tih a sawi bawk.

Hoeness chuan, "Bayern bakah Liverpool leh Real Madrid pawhin Alonso hi lakluh an duh a, Leverkusen pawhin chelh an tum bawk," a ti a, Alonso lakluh an tum ngei thu a sawi rualin, elpui an neih thu a sawi.

Kum 42 mi Xabi Alonso hian player a nih laiin Real Sociedad aṭanga a hming chher ṭanin, Eibar-ah loan-in a khel tawh bawk a, hemi hnuah hian Liverpool, Real Madrid leh Bayern Munich tan a khel.

Liverpool-ah season nga a khelh chhungin league nomawi chawi lo mah se FA Cup, FA Community Shield, Champions League leh UEFA Super Cup-ah te champion nomawi a chawi a, Reds ṭantute ngainat a hlawh hle.

Anfield a chhuahsan hnuah Real Madrid panin, La Liga, Copa del Rey (2), Spanish Super Cup leh Champions League-ah te a champion a, Bayern Munich tan Bundesliga (3), DFB-Pokal leh DFL Supercup-ah te champion nomawi a chawi zui.

Spain tana World Cup nomawi pakhat leh European Championship nomawi pahnih chawitu ni bawk Alonso hian a club hlui aṭang vekin sawmna a dawng tihna a ni a, Spanish coach tan thutlukna siam a harsa hlein a rinawm.

Hoeness chuan, "Alonso hian boruak sangah pawh coach ṭha tak a ni thei tih a pholang tawh a, tun dinhmunah chuan coach hna nei lo emaw, chawl hahdam emaw han sawi mai tur hi an vang ve bawk a, Bayern ṭhatzia hrilha inthlem luh mai hi a awlsam bik lo," a ti zui.

Bayern hi an coach Thomas Tuchel chuan season tawp rualin a chhuahsan dawn a, Liverpool boss Jurgen Klopp chuan Anfield a chhuahsan tur thu a tichiang tawh bawk. Hetihlai hian Alonso duhtu zinga sawi tel Real Madrid hi Carlo Ancelotti hnuaiah an la awm mek a, Italian coach hian December lawk khan kum 2026 thleng cham turin contract a nei.

Liverpool leh Bayern hi chuan season thar aṭanga enkawl ṭan turin an dawr ngei ang tih a chiang a, Real-in an dawr dan tak hi sawi thiam a harsa - Alonso hian Leverkusen-ah hian kum 2026 thleng contract a nei a, hetih hunah hian Ancelotti contract a tawp dawn chiah bawk a, hemi atan hian Real hian an lo dawr lawk a ni mai thei.

Alonso hian Leverkusen hi Bundesliga-ah point 10 ngawtin hma a hruai falpui mek a, league match riat chiah khelh tur a awm tawh avangin champion thei dinhmunah an ding mek.