Match hnih atan Xavi an hrem

Barcelona coach Xavi chu Atletico Madrid an hneh ṭuma a khawsak dan avangin match hnih atan hrem a ni a, La Liga-a Las Palmas an mikhual hun leh Cadiz an lenchilh hunah a team a ho thei dawn lo.

Catalan club hian Pathianni zan khan league match-ah Atletico Madrid chu 3-0 in an hneh a, he inkhelah hian coach Xavi chu red card pek a ni. Xavi hi a tirah yellow card chauh pek a ni a, mahse, khelmual sirah a lungawi lohna a tihlan chhunzawm avangin first half-ah hnawhchhuah a ni.

La Liga chuan Xavi chet dan hi ennawnin, match hnih atana hrem turin an ti a, hei bakah hian €600 (£514/$655) a chawi ang a, Barca hian €700 an chawi ve dawn bawk niin khawthlang media-te chuan an tarlang.

Barca leh Xavi tana lawmawm chu match hnih chauh an hrem hi a ni - a tirah match thum an hrem mai rinna a lian hman a, match thum hi hrem ta se April 21 zana Real Madrid an lenchilh hunah a naute a ho thei dawn lo tihna a ni a, Barca tan a pawi thui thei.

Mahse, match hnih chiah hrem a ni a, Barca fans an lawm ang. Xavi hian coach a nih hnuah insum theihna a tlachham hret niin a lang - La Liga-ah hian yellow card vawi 24 a chawi tawh a, league match 5.5 dana yellow card hmu zel ang a ni phak.

Player a nih lai aiin Coach a nih hnuah card a hmu hnem zawk a, player a nih lai khan match 13 dan zela yellow card hmu ang chauh a ni. La Liga champion lai Barca hi league table-ah pahnihna an ni mek a, hmahruaitu Real chu point riatin an phak lo mek.