India-in Guwahati an thleng

Indian football team chuan Saudi Arabia-a Afghanistan an inhnehtawkpui hnuin, Inrinni khan India an thleng ve leh ta a, March 26, Thawhlehni zana Afghanistan nena an match hnihna an khelhna tur hmun Guwahati-ah an inkulh nghal.

Blue Tigers hian Ningani zan khan Afghanistan hi Saudi Arabia-ah hmachhawn tawhin, 0-0 in an inhnehtawk a, fans an lungawi lo hle - Thawhlehni zanah chuan tlawm a thiang tawh lo ang.

India leh Afghanistan inhmachhawnna hi FIFA World Cup 2026 qualification (AFC) second round a ni a, India hian match hmasa berah Kuwait chu hmachhawnin, 1-0 in an hneh.

Fan-ten beiseina sang tak nena an thlir laiin, match hnihnaah Afghanistan an hneh zo lo a, an group-ah Qatar an awm ve bawk si avangin Blue Tigers tan Afghanistan laka point thum hlawh loh hi a pawi.

Thawhlehni zana an inkhel tur hi India captain Sunil Chhetri tan ram tana match 150 a khelhna tur chiah a ni bawk a, India tan chak a ṭul.

Blue Tigers squad-ah hian Mumbai City player pahnih Lallianzuala Chhangte leh Lalengmawia Ralte (Apuia) te an tel a, Mizo player-te hi coach Igor Stimac-a hnuaiah player pawimawh an ni.