Final-ah Mizoramin Manipur an hneh lo

3rd NorthEast Olympic Games-ah Mizoramin khingpuite hneh vekin football final an lut a, gold medal inchuhnaah Manipur lakah 2-1 in an chak lo. Mizoram hian Isaak Malsawmkima hmangin goal khung hmasa mah se Manipur-in second half-ah Deny Singh leh Sanathoi te goal hmangin an lehthal.

Mizoram hian group stage-ah Manipur hi 4-0 in an hneh tawh a, final-ah pawh an inringtawk. Chutihrualin Manipur lamah Sanathoi-a a rawn kir a, ani hi Santosh Trophy-a Mizoram 4-0 a an hneh ṭuma man of the match kha niin goal liah hian a inrawlh vek.

First half-ah Mizoram an khel ṭha zawk a, minute 41-naah Vanlalthanga ball vawrh chhoh chu Isaak-a'n ti perin F. Lallawmkima'n a pe let leh a, Isaak-a'n goal hmahruai a khung. Manipur-in chance nei ve bawk mah se Mizoram an khel ṭha zawk.

Second half-ah Mizoram defender Ramngaihsanga lakchhuah a ngai a, Mizoram an talbuai phah. Hun chanve hnulamah Manipur an chungnung zawk a, midfeld an thunun avangin Mizoram an che thei lo.

Minute 74-naah Manipur-in corner kick hmang ṭangkaiin Deny Singh-a'n a khung a, 1-1 a nih hnuah pawh an chungnung zawk zel. Minute 88-naah Sanathoi-a'n a theihna sang tak a rawn lantir a, a chet ranna hmanga petna tur khawp insiamin chakna goal a khung.

Mizoram coach Lalbiaksanga Colney chuan, "Corner kick kha goal kick tur zawk a ni a, referee thultukna dik lo vang zawk a ni. Kan squad chhah tawk loh kan tuar bawk. Player 20 a hruai theih a, hriat sual vangin player 18 chauh kan kal. Hei hi result tidanglamtuah ka ngai bawk," tiin Vanglaini a hrilh.