An mualah England an tlawm

Brazil chuan hun tawp dawna Endrick-a goal khat khung hmangin England 1-0 in an hneh a, an player ṭha ṭhenkhat hliam vanga an inlan loh nual bakah Kyle Walker chu malpui hliam vanga lak chhuah a ni.

Three Lions tan Euro 2024 inbuatsaihna a ni a, an khingpui Brazil hi Copa America khel tura intuaihriam an ni thung - friendly match a ni a, season pangngai pawimawh vanglai tak a nih avangin player inhnukdawk an tam.

Player ṭha inlan lo an tam avangin England manager Gareth Southgate chuan Anthony Gordon, Ezri Konsa leh Kobbie Mainoo te chu ram tana an match hmasa ber khelhna hun a siamsak a ni.

Striker ṭha Harry Kane chu hliam vangin a inhnukdawk a, a club Bayern Munich lamah a kir nghal. Arsenal forward Bukayo Saka pawh a lo inhnukdawk tawh bawk - Walker inhliam chu Manchester City tan chanchin lawmawm lo tak a ni ang.

Brazil pawh hi an ṭhat dan berin an inlan bik lo. Goal khungtu Endrick hi kum 17 mi chauh a la ni a, tun nipuiah kum 18 a tling ang - nipui bazar hunah hian Spanish club lian Real Madrid a zawm dawn a, a hnampui Vinicius Junior kiangah a khel dawn a ni.