Euro 2024 khel tur a hriat kim dawn ta

Football ngaina tute tan nipui nuam tak a ni leh dawn tih a chiang reng - European Championship leh Copa America en tur a awm dawn a ni. Euro 2024 khel tur ramte chu zanin hian a hriat kim dawn.

Germany rama inelna hmachhawn tur hian ram 21 an tling chiang tawh, hmun ruak pathum la awm chu zanin hian playoff final hmanga hnawhkhah a ni dawn a, inkhel pawimawh bik pathum a awm dawn tihna a ni.

Zanin dar 10:30 hian Georgia chuan Greece an mikhual dawn, zanlai dar 1:15-ah Wales chuan Poland an mikhual dawn a, a hun ngaiah hian Iceland chuan indo vanga buai mek Ukraine an hmachhawn thung ang.

Lewy awmna Poland

Tun hma lama an sulhnu leh player an neih dan en chuan Wales aiin Poland hi rinkai leh buk rit zawk an ni - an intawn hnuhnung pangaah Wales hian chak an nei lo. Mahse, zaninah an inkhelhna tur hi Cardiff City Stadium a ni a, mipui puihna an dawn ṭhat dawn avangin beisei an nei sang ngam.

Wales hian playoff semifinal-ah Finland chu 4-1 in an sawp, goal khung an harsat lo hle. Inkhel dangah Poland chuan Estonia 5-1 in an sawp ve bawk, ram pahnihte hi an goal nawr an na hle tihna a ni, zanina goal kan hmu tam a nih pawhin a mak lo ang.

Semifinal-a hnehna an chan hnuah Wales manager Robert Page chuan an zinkawng a la tawp loh thu leh Poland hneh an tum thu a sawi a, a zawna a vawi thum nan European Championship khelh ngei an tum ruh hle a ni.

Poland hi awlsam taka paltlang theih erawh an ni dawn lo. Khawvel striker ṭha berte zinga mi Robert Lewandowski neitu an ni a, playoff semifinal-ah khan Lewy-a goal tel loin goal nga lai an khung thei bawk, an ngaihtuahawm loh ve hle.

Chutihrualin, World Cup 2022 last 16 hial thleng thei mah se Poland hian kumin Euro qualifier match hmasa lamah Czech Republic an ngam lo, a hnuah Albania hneh lo bawkin coach Fernando Santos an ban phah hial, an kum ṭha ber a ni lem lo.

Besei anga result an neih ṭhat tawk lohnaah hian Robert Lewandowski pawhin hun harsa a tawng. An ram mipuiin 'Polish sportsman of the year' an tlan khan Lewy hi 17-na a ni phak chauh a, tun hnaiah fans lakah a tla na tawk lo.

Poland tan match 147 a khelh leh goal 82 a khungte hi an ram record ve ve a ni a, a hun harsa tawh aṭanga thawh chhuah leh theihna ramchang chu zanin hi a ni - Wales lakah an ram a chakpui a nih chuan mipui thinlungah a tla na thar leh ang.

Ram dangah Ukraine

Ukraine hi Russia nen an indo mek a, hun rei tak chhung buaina an neih tak avang hian infiamna lamah pawh nghawng a nei nasa hle. Playoff final hi a thlengtu tur ni mah se anmahni ramah an khel dawn lo - Poland rama khelmual pakhat Tarczynski Arena-ah Iceland an lo mikhual ang.

Ukraine hian qualifying an khel ṭha pangngai viau. Group C-ah point 14 neiin pahnihna Italy nen an inzat, mahse Azzurri nen an intawnna bikah record nei chhe zawk an nih avangin pathumnaah an awm, playoff semifinal-ah Bosnia 2-1 a hnehin an tlang chho a ni.

Blue and Yellow (Ukraine sawina) tan Euro khelh hi thil thar a ni tawh bik lo, kuminah hian an tling a nih chuan a zawna a vawi lina tur a ni tawh ang. Zanina an mikhual tur Iceland nen an intawn hnuhnung ber (2017 September) khan 2-0 in an chak a, tun ṭumah pawh rinkai zawk an ni ang.

Iceland hi chuti ngawta dah hniam chi erawh an ni dawn lo, playoff final lut tur hian khualmualah Israel chu 4-1 in an sawp thei, tun ṭumah pawh hian inrintawkna sang tak nen Ukraine an hmachawn thei dawn tihna a ni a, zuam sual theih tur tak an ni ang.

Tlarhma lamah Iceland hian Aron Gunnarsson, Hakon Arnar Haraldsson leh Albert Gudmundsson te an nei a, anni hi tun qualifying kal laia goal thum khung tling tawhte an ni a, goal hmaah chuan an ngaihtuahawm lo tura ngaih a ni - Ukraine tan fimkhur a ngai dawn.

Chutihrualin, Iceland hian khualmuala match 10 an khelh aṭangin vawi nga zet chu goal hnih an chhuah tling vek. An tlarhnung phui tawk lo hi Girona striker Artem Dovbyk chuan a hre kiau dawn - Ukraine hmatawng hian goal khung leh assist neih a harsat lo tih chu hriatsa a ni.

Georgia mualah Greece

An inkhelh hun hi dar 10:30 a nih avangi zanina inkhel tur pathum zingah an dinhmun a chiang hmasa ber dawn. Ram pahnih hi inkhel tawk viau tura ngaih an ni a, mualneitu Georgia hian mikhual an thlen hnuhnung 12-ah vawi riat hnehna an chan theih avangin beisei an nei sang zawk ang.

Georgia hian tlarhmaah Khvicha Kvaratskhelia leh Budu Zivzivadze te an nei. Napoli winger Kvaratskhelia hi season hmasa lama Serie A champion an nih theih nana player pawimawh leh hmuhnawm kha a ni a, tun season kal laiah pawh a club tan goal 10 a khung leh tawh.

Naples khaw club tan chauh pawh a ni lo - Kvaratskhelia hian an ram Georgia tan match 28 aṭangin goal 15 ngawt a khung thei, nikum khan an ram record siam turin a zawnin match li chhung goal a lo khung tawh, zaninah pawh ani leh Zivzivadze te inkawp hi an innghahna tur an ni ang.

Georgia khingpui tur Greece hian player mala langsar leh tun laia vul tak tia tia sawi tur an nei lem lo, mahse tawnhriat an nei tam tawhin an thawhhona ṭha vanga tun dinhmun thleng thei hi an ni; Kazakhstan 5-0 ngawta sawp thei team hi dah hniam a remchang lo.

Midfielder Anastasios Bakasetas leh winger Giorgos Masouras te hian theihna sang tak an neih bakah, khelmual chhungah an ṭhiante an ho khawm ṭha ṭhin. Anni pahnih hi Greece player dang tena an thlamuanpui tur an ni leh dawn a, an chungah mawhphurhna a sang hle ang,