IWL-ah Grace-i telna Odisha FC an champion

India rama hmeichhe football inelna sang ber Indian Women's League-ah Grace Lalrampari telna Odisha FC chuan match hnuhnung berah Kickstart chu 6-0 a hnehin an champion.

League match hnuhnung ber hi March 24, Pathianni khan khelh a ni a, Odisha FC hian point thum hlu tak an hlawhchhuah avangin match 12 aṭangin point 31 an hlawh chhuak. Pahnihnaa awm Gokulam Kerala-in East Bengal 5-1 in sawp mah se point 29 an hmu a, Odisha FC hi point hnihin an pha lo.

IWL hi a season sarihna a ni a, Salem Veng nula Grace-i hian Odisha FC a champion pui hma hian Gokulam Kerala a champion pui tawh bawk. Inelnaah hian team pasarih Odisha FC, Gokulam Kerala, Kickstart, Sethu, Hops, East Bengal leh Sports Odisha te an awm a, vawi hnih ṭheuh an inkhel chhuak.

Grace-i hi defensive midfield-ah khelin match zawng zawngah bul a ṭan vek a, ṭum hnih minute 75-naah an thlak tih loh chu a khel kim vek bawk. Gokulam a khelh lai angin tun ṭum inelnaah goal khung lo mah se a match khelh zat aṭangin team tan a pawimawhzia a lang.

Odisha FC midfielder Grace-i chuan, "Gokulam-a kan champion ṭum leh tun ṭuma kan champion ṭumah hian team ṭha ber ve ve kan niin ka hria. Tun ṭuma mi danglamna chu teammate ṭha bakah coach ṭha min pe. Kan coach Crispin Chettri hian defensive midfield-ah min chher hriam a, ka theihna sang ber kha min phawrhsak a ni," tiin coach a fak.

Odisha FC-in match hnuhnung ber an khelh ṭum hian Grace-i hi a laizawn pahnihten a hmun ngeiah an ṭawiawm. Grace-i hian IWL-ah season ruk a khel tawh a, ṭum hnih a champion.

Mizo nula Grace-i chuan, "India ram state dangte hmeichhe football hmasawnna atan hma an lak chakzia leh facilities ṭhat tawhziate ka hmuh hian kan state Mizoram tan hian rual ka awt hle. Player naupang leh harsa zawkten chhawmdawltu ṭha mahni state chhung aṭanga an neih ve a, mi tam zawk hlawhtlinpui tham khawpa ngaihven a hlawh ve hi ka duhthusam a ni," tiin Vanglaini a hrilh.