Machac lakah Murray a tlawm

Andy Murray-a'n a zawnin match hnih hnehna a chang a, a boruak ṭha chho viau mah se nimin zing lam khan Tomas Machac hneh loin Miami Open 2024 khelh laia last 32-ah a zinkawng a tawp.

Britain tlangval leh Machac-a te an inkhel tawk takzet a, a tawpah erawh Czech Republic tlangval zawkin 5-7, 7-5, 7-6 (7-5) in hnehna a chang a, last 16-ah chuan Italian mi Matteo Arnaldi nen an inkhel leh ang.

Kum 36 mi Murray hi hliam leh harsatna hrang hrang ten tlakbuak ṭhin mah se tennis a la chawlhsan mai duh bik lo a, kuminah pawh a theih anga tam match a la khel zel - mahse darkar thum leh minute 27 an khelh meuh chuan kum 23 mi zawk a dingchang kha a mak lo.

Miami Open vawi hnih lo champion tawh Murray chuan, "A tawp ka khar dan khan duhthu a sam lo a ni mai thei, ka khelh dan leh mipui boruak zawng zawng kha chu a makin a lawmawm takzet," tiin chak lo mah se a khelh danah a lungawi.

Inkhel dangah Jannik Sinner chuan set hmasa ber hloh mah se a tho chhuak. Australian Open champion hian Dutch player Tallon Griekspoor chu 5-7, 7-5, 6-1 in a hneh - vawiin chawhma lamah Christopher O'Connell nen an intum leh ang.

Holger Rune-a erawh a chak lo zawkah a ṭang. Denmark tlangval Rune hi seeded parukna lai a ni phak a, mahse a match hmasa berah Fabian Marozsan nen minute 59 lek an inkhelh chhungin 6-1, 6-1 in a chak lo a ni.