India tan mualpho nawn a thiang lo

FIFA World Cup 2026 qualification (AFC) second round-ah India chu zanin hian an inlan dawn a, zan dar 7:00 hian Afghanistan an mikhual ang - match hmasa zawkah team pahnih hi 0-0 in an inhnehtawk a, Blue Tigers tan tlawm chu mualphona a tling dawn.

Fans tam takin an intawn hmasakah pawh hian Blue Tigers hi chak tur chiangah an dah a, an ring sual - Indian player te leh coach Igor Stimac-a'n dem an hlawh zui a, dem nawn an hlawh duh loh chuan zaninah chak a ṭul ang.

India forward Lallianzuala Chhangte chuan, "Beiseina sang tak kan nei a, chak turin kan rilru kan siam," tiin Vanglaini a hrilh a, Afghanistan lakah point hloh nawn a duh lo.

Team pahnih intawn hmasakah hian Damac Stadium, Khamis Mushait, Saudi Arabia-ah an inkhel a, sea level aṭangin 2,470 metres a ni a, inkhelh a harsa. Guwahati khawpuiah an inkhel tawh dawn a, India tan chhuanlam a neih theih tawh loh.

Afghanistan an ṭha

Ropui taka Bengaluru a kaihhruai vanga hriat hlawh tak Ashley Westwood-a'n Afghanistan a enkawl a, Indian football hrechiangtu a nih avangin Guwahati-ah pawh English coach hian point hlawhchhuah ngei a tum dawn.

FIFA ranking-ah 158-na daih ni mah se Afghanistan hian an player zingah European football khel an nei nual a, zuam sual theih an ni. Russian club lar Anzhi Makhachkala tan pawha lo khel tawh Sharif Mukhammad hi tlarhnungah a pawimawh leh dawn a, ani hi Gokulam Kerala leh Churchill Brothers tana a lo khelh tawh avangin India hrechiangtu a ni.

Captain Zohib Islam Amiri pawh hi Mumbai FC, Dempo, FC Goa, DSK Shivajians, Chennai City, Gokulam leh Real Kashmir tana lo khel tawh a ni a, a tawnhriat ringawt pawh a hlu dawn - Canada club A.S. Blainville tan a khel mek.

Goal khung turin Indonesian second division club PSPS Riau tana khel lai Omid Popalzay an nei a, midfield-ah Georgian first division club Torpedo Kutaisi tana khel Rahmat Akbari a ṭangkai dawn bawk - ani hi A League club Brisbane Roar leh Melbourne City tan a khel tawh ṭhin.

Chhetri 150

Kum 39 mi ni tawh mah se, Sunil Chhetri-a'n India jersey hain khelmual a la mawi ve reng a, zaninah a inlan a nih chuan ram tan match 150 a khel tling chiah ang - match 149-ah goal 93 ngawt a khung tawh a, India tana khung hnem ber a ni.

Hei hi a ni mai lo. Chhetri hian ram tana goal khung hnem lamah Cristiano Ronaldo (128 goals), Ali Daei (108) leh Lionel Messi (106) chiah tluk loh a nei tawh a, Ronaldo leh Chhetri a phak rinawm chiah lo mah se, record chelhtu ni reng ṭhin Daei goal khung zat khung turin chance a nei.

June 12, 2005 khan Chhetri hian ram tana a match hmasa ber khelin, friendly match-ah Pakistan an hmachhawn a, ram tana a match hmasa berah hian goal khung nghalin, 1-1 in an inhnehtawk - zaninah AIFF chuan Chhetri hi a chawimawi dawn.

Bengaluru striker hian a vanglai a phak tawh lo tih hai rual a ni lo a, mahse, mi tam takin Indian player ropui bera an ngaih hian zaninah ram tana match 150 a khelh tlin lawm nan goal khung a duh ang.

An inpeih e

Mumbai City player forward Lianzuala'n chance an neih ṭhat thu sawiin, "Mahni khelmuala khel tur kan ni tawh a, kan tan chuan chance a ṭha. Inbuatsaihna pawh kan nei ṭha a, kan duh angin kan chawl hahdam tawh bawk," a ti.

Lianzuala chuan, "Ṭawngṭainaah min lo hre reng dawn nia," tiin Mizo mipuite chu an chak ngei theih nana ṭawngṭaipui turin a sawm a, squad-ah hian Lalengmawia Ralte (Apuia) chu Mizo awm ve dang a ni bawk.

Stimac-a'n Afghan an hmachhawn hmasakah Mizo player pahnih hi bul a ṭantir a, zaninah pawh bul a ṭantir a rinawm. Tlarhmaah Chhetri kawp turin Vikram Pratap Singh chu rinnawn a ni ang em, sawi thiam a harsa a, Afghan laka a chance hlahte thlirin Manvir Singh hian bul a ṭan nawn a nih chuan fans lungawi lo an awm nual ang.

Gurpreet Singh Sandhu chu si ban nghaktu rinawm ni leh tura beisei a ni a, Anwar Ali leh Rahul Bheke te tlarhnung laiah an inkawp leh thei a nih chuan Afghan tan paltlang an harsa dawn.