Silly Point : IPL 2024 CHIBAI

India ram thlasik khawvawt an reh chiah a, ṭhangkhat lian chuang zet cricket atchilhna ram India-in a ngahhlelh chu, Vau Thla tawp lam aṭanga Ṭomir Thla laihawl vel thlenga nipui cricket kutpui Indian Premier League, BCCI-in a huaihawt ṭhin hi a ni awm e. Hapta khatna kan zo fel ta der a, mit leh beng a tlai nghal der e.

Bouncer 2

Tunlai cricket, batsman-te chet ṭhat theih nan bera dan leh hrai thlak danglamna emaw tih tawh mai turah, pace bowler te tan thawk han lak ve duaina tur pakhat chu kumin IPL-a over khata bouncer vawi hnih vawm thei tawh tur hi a ni ngei ang. Ni e, batsman te vulh kan tum lutukah hian, bowler-te thlanmualah cricket hi a chang zo ang tih te pawh a hlauhawm.

Runs a tam tho

Indian domestic cricket season tawp lam leh nipui thaw tir ni sen sa, ṭhal va ek char lai ni bawk si Vau Thla chawhnu lam mah nise, pitch te pawh tlemin a lo roin, a lo chuai lam a, ball pawh sawt muang deuh tawh tur a ni. Mahse BCCI chuan stadium tinte chu duat taka enkawl turin curator-te a chah a, tun hapta khatna inkhelhna na na chuan, runs pawh an vaw chhuak ṭha tlangpui. Inkhel panga kan hmuh chinah, league stage round 1-naah team 10 te inkhel apianga an vuak chhuah zat chu chawhrualin run 180 chiah chiah ang vel a ni. A hmuhnawm chho zel turah ngai ang!

Bul ṭan ṭhat, a chanve zo

League stage thui tak la inkhelh kual tur a awm nachungin, infiamna dang league rei chi hmanga inelna ang bawkin, IPL history-ah pawh hian, a tir lama bul ṭan ṭha leh points lo nghah hman te bawk hi a tawpah ropuina rama lut te an ni tlangpui. Kuminah pawh hian a nih leh ngei ka ring.

I lo thlir zel ang