Chanmari FC coach tur Sanga Hmar

Mizoram Premier League club Chanmari FC chuan MPL-a record nei ṭha ber coach Lalsangzuala Hmar chu coach atan an lalut. Chanmari hian MPL5-a Sanga Hmar hoa an champion hnuah Mizorama inelna sang berah hian an la champion leh lo a, result ṭha zawk beiseiin Santosh Trophy-a Mizoram coach hi an lalut.

Chanmari hi Sanga'n hming a chher ṭanna a ni a, MPL hmasa berah khan Lalchhuanawma (LCh-a) hnuaiah assistant coach hna a thawk. H. Vanlalthlanga'n Chanmari a enkawl khan Sanga hian assistant coach hna a thawk chhunzawm a, Mizo coach ropui Thlanga hnuaiah thil tam tak a zir belh bawk.

Thlanga leh Sanga te inkawpin MPL2-ah Chanmari FC an champion a, hetih hunlaia champion theihna MFA Cup, I Day Football leh MFA Super Cup thlengin an champion vek. Sanga hian MPL4-ah Bethlehem Vengthlang zawmin head coach hna a chelh ṭan a, MFA Super Cup-ah Manuel Retamero enkawl Aizawl FC hnehin a champion pui.

MPL5-ah Chanmari FC a champion a, hming a chher lehzualna erawh Chhinga Vengah niin Chhingcows chu MPL6-a a champion pui bakah I Day Football leh MFA Super Cup-ah an champion. Kum 2017 khan match 22 hneh loh nei loin record thar an siam a, kum 2018 khan match 26 hneh loh nei loin record thar an siam leh bawk.

MPL7 final-ah Sanga enkawl Chhinga Veng hi final-ah Aizawl FC lakah an vanduai a, MPL8-ah Sanga enkawl Electric Veng FC chu Aizawl FC lakah an vanduai leh bawk. MPL9-ah Sanga an theihna sang tak a rawn lantir leh a, Chawnpui FC chu a vawi khat nan a champion pui.

MPL10-ah Sanga hian Chhinga Veng a enkawl a, semifinal-ah champion zui ta Mizoram Police an hneh lo. Melthum pa Sanga hian Mizoram team pawh a enkawl fo tawh a, Santosh Trophy-ah vawi li semifinal a thlenpui tawh bawk.

Chutihrualin MFA lamin MPL11 awm hun tur an la puang lo a, MPL11 playoff pawh khelh a la ni lo. MPL10-ah khan FC Venghnuai chu table hnuai berah awmin an relegate a, pasarihnaa awm Project Veng FC chu playoff khel tur an ni. MPL Board-in tun thlengin playoff khelh hun an la ti chiang thei lo! Zonet leh MFA-in MPL atan MPL10 thleng contract an ziak a, contract thar an la ziak leh lo bawk.