Premier League Hall of Fame-ah Ashley Cole

Arsenal leh Chelsea defender hlui Ashley Cole chu Premier League Hall of Fame-ah a hming dah luh a ni a, player ropui bik Alan Shearer leh Thierry Henry te kiangah a hming a inziak dawn ta a ni.

England international hlui Cole hian Gunners leh Blues tan season 15 a khel a, hetih chhung hian Premier League nomawi vawi thum a chawi a, English football inelna sang berah hian defender ṭha leh ropui berte zinga mi a ni phak.

Arsenal tana a khelh laiin, kum 2003-24 season khan hneh loh nei loin an champion - Cole chanchin ropui lai an sawi apiangin "Invincibles" hi sawi lan a ni zel a, sulhnu ropui leh hriatreng hlawh tur bik a ni.

Premier League match 385 a khelh aṭangin Cole-a'n clean sheet vawi 147 a nei a, goal 15 khungin a ṭhiante khung tur vawi 31 a siamsak bawk. London club pahnih tana a thil tih hi a nep lo hle.

Cole chuan, "Premier League Hall of Fame zinga han tel ve chu ka lawm ngei mai, inkhelh chawlhsan tawh hnuah hetiang thil tawn chu lawmna kha a ti famkim chiah a ni. Ka inkhelh ve laia theihtawp ka lo chhuah ve tawhna rah chhuah kha a ni.

"Ka chawr chhuahna Arsenal leh hun tam tak ka hmanna Chelsea tana ka thil tihte kha ka hre reng. Tunah chuan player ropui Alan Shearer, Thierry Henry, Didier Drogba leh Rio Ferdinand te kiangah ka hming a lang ve ta a ni," tiin a sawi.

Premier League chief executive Richard Masters chuan, "Premier League defender zinga a ṭha tih ber sawi tur ni ta se, mi tam tak chuan Ashley Cole hming an sawi ngei ang. Arsenal tana a ṭhatna leh hlawhtlinna kha Chelsea tan a chhawm," a ti.