MotoGP Portugal-ah Jorge Martin a chak

Bike intlansiakna sang leh ngaihhlut hlawh ber MotoGP chu Pathianni zan khan tlan chhunzawm a ni a, tun season intlansiak pahnihna Portuguese Grand Prix-ah hian Jorge Martin chuan a tir aṭanga hmahruai chungin hnehna a chang.

Kum 26 mi Martin-a hian Ducati bike a khalh a, intlansiak hmuhnawm tak hi minute 41 leh second 18.138 chhunga thleng chhuakin a chungnung ber, a hnungah hian Enea Bastianini a thleng.

Martin ang bawka Spanish rider Pedro Acosta chu pathumna a ni. Acosta hi kum 19 mi chauh a la ni a, bike intlansiakna sangah hian a inlan vawi hnihnaah dawhsan (podium) a lawn phak der a ni - a tan hun chhinchhiah tlak bik a ni ang.

Anni pathum hnungah hian world champion Francesco Bagnaia leh MotoGP vawi ruk champion tawh Marc Marquez te an inum na hle, mahse lap thum chauh tlan hmabak an neih tawhah intipalhin an hnungtawlh phah.

Season hmasa lam ang bawkin intlansiak tak an neih hma Inrinniah 'Sprint Race' an nei ṭhin, point hmuh tur a awm ṭhin bawk. Maverick Vinales chuan Sprint Race-ah hnehna a chang thung a, a hnungah Marquez a thleng a ni.

Portuguese GP pakhatna Jorge Martin chuan, "A bul ṭan ṭhat a pawimawh tih ka hria a, a bik takin lap hmasa ber aṭanga hmahruaitu nih theih kha a pawimawh takzet tih ka hre bawk, chumi tur chuan theihtawp ka chhuah.

"Kar tluanin kan inbuatsaih ṭha em em a, chumi rah chhuah chu a takah kan hmu. Lap sarih vel kan tlan zawh kha chuan rilru tawt zualpui a reh ṭan deuh tawh, a hnu lamah chuan nuam ti takin ka tlan chhunzawm," tiin a sawi.

Ducati rider Martin-a hian point 60 hmuin rider championship table-ah hma a hruai mek, amah hnaih bertu Brad Binder chuan point 42 a nei thung. KTM bike khalhtu Binder hi Portugal-ah hian palinaah a thleng a ni.

Martin lawm niah Francesco Bagnaia tan erawh hun duhawm lo a ni thung. Kum 27 mi Bagnaia hian tun season intlansiak hmasa berah khan hnehna a chang, tun ṭumah erawh Marquez nen an in bakkaih vangin a beisei ang result a nei chhunzawm lo.

Honda aṭanga Gresini Racing zawmtu Marquez hian an intihpalh hnuah inelna hmachhawn zui mah se 16-na a ni hram - Bagnaia erawh a hnu lawkah a tlan chhunzawm ve thei tawh lo a ni.

Intlansiak zawh hnuah Marquez hi a dar (shoulder) endik turin damdawi inah hruai a ni a, mahse hliam na tak a nei lem lo. Tun hnai season thum chhung vel chu hliam vangin a lo buai tawh a, amah leh team lam an hlauthawng leh hman hlein a rinawm.

MotoGP hi tun season chhungin intlansiak 21 awm tura ruahman a ni a, inelna pahnih an tlan zo fel tawh. Pathumna atan April 14 hian Circuit of the Americas, Austin-ah Grand Prix of the Americas an tlan leh ang.