Walker leh Maguire ten Belgium hmachhawn thei dawn lo

England defender Kyle Walker leh Harry Maguire bakah back-up goalkeeper Sam Johnstone te chu hliam vangin Three Lions squad aṭangin an inhnukdawk a, player pathum hian zanin dar 1:15-a Belgium nen friendly match an khelh turah Three Lions tan khelmual an lut thei dawn lo.

Player pathum inhliam avang hian England Under 21 squad-a awm mek Burnley keeper James Trafford leh Manchester City defender Rico Lewis te chu senior team tana inlan tura koh an ni a, kum 21 mi Trafford hi senior team-a inlan tura koh a nih vawi khatna a ni.

Hetihlai hian kum 19 mi Lewis hian November thla khan North Macedonia hmachhawnin, England tana a match hmasa ber a lo khel tawh a, City tana a khelhpui Walker inhliam vangin ram tan koh a ni leh ta.

United defedner Maguire, City player pawimawh Walker leh Crystal Palace keeper Johnstone te hi an club ṭheuhah an kir tawh a, Bayern Munich striker Harry Kane leh Arsenal winger Bukayo Saka te chu England squad aṭang hian an lo inhnukdawk tawh bawk.

Kane inhliam vang hian Aston Villa striker Ollie Watkins leh Brentford forward Ivan Toney ten ram tan chance an neih phah a, Brazil nen friendly match an khelh ṭumin Watkins hian bul a ṭan a, Toney hian Belgium lakah bul a ṭan dawn bawk.

England boss Gareth Southgate chuan, "Toney hian ram tana a bul ṭan hmasak ber tur a ni a, chu chu kan hriatsak reng a ngai. England-ah hi chuan player-ten chance tam an nei hleithei lo a, chu chu anni pawhin an hrethiam a, kan khawvel kalphung a ni tlat.

"Mahse, Toney hi a inringtawk a, club tan season duhawm tak a hmang a, Belgium a hmachhawn ngei dawn. A pawimawh ber chu mahni inrintawk a ni a, top forward-te hi chuan hei hi an nei vek," a ti.

Southgate chuan Toney chu fak chhunzawmin, "A passing, a khelh dan, a ṭhat dan engkim mai hi ka la hre dawn chauh. Player-te nen hian thawhho reng loh chuan hriatchian an har," a ti a, an inhrawn tam hunah Toney chu ram tana a la ṭhat belh sauh a ring.

Kum 28 mi Toney hian 2021-22 season aṭangin Premier League khel ṭan ve chauh mah se, English top flight league-a striker 'hot'ber pawl a ni der tawh. Premier League-a a season hmasa berah inelna hrang hrangah match 37 khelin goal 14 a khung a, season hmasa khan match 35-ah goal 21 a khung.

May 17, 2023 khan sum inthapna lamah a lo inhman avangin thla riat atan hrem a ni a, January 2024 khan hremna tuar zoin a lo kir a, tun season-ah Brentford tan match 10 khelin goal li a khung leh der tawh - England tan vawi khat chiah a la inlan.