Concacaf Nations League champion USA

United States tan Tyler Adams leh Giovanni Reyna ten goal an khung a, final-ah Mexico 2-0 in an hneh. AT&T Stadium, Arlington, Texas-ah inelna hi neih a ni a, Jamaica-in Panama 1-0 a hnehin pathumna an ni ve bawk.

Concacaf Nations League hi a vawi thumna a ni a, United States an la champion vek. Gregg Berhalter-a kaihhruai US team-ah hian Christian Pulisic chu captain a ni a, Mexico tan goalkeeper Guillermo Ochoa a captain bawk.

Final inkhel a nung ṭha a, Pulisic hmangin US-in chance an nei ṭha hmasa zawk. US tan Giovanni Reyna, Weston McKennie leh Timothy Weah te an hmuhnawm a, an goal hmahruai khung erawh Tyler Adams-a pet ṭhat vang liau liau a ni.

Bournemouth midfielder Tyler hian minute 45-naah hla tak aṭangin kawh zetin goal kilah a pet lut a, goalkeeper Ochoa tan pawh dah ngaihna a awm lo.

Second half-ah pawh Weah leh Reyna te hmangin US-in chance an insiam nghal a, Mexico-in chance ṭha bik insiam an harsat. Chutihrualin America forward Henry Martin-a'n box chhungah chance ṭha tak a hlah.

Minute 63-naah Mexico tlarhnungin hmun himah ball an pet chhuak thei lo a, defender ball tauh chhuah na tawk lo chu Reyna-a'n volley letin United States goal hnihna a khung.

Mexico-in Santiago Gimenez hmangin penalty hmuah an inngai a, VAR hmanga ennawn a nih hnuah referee-in Gimenez hi yellow card a pe ta zawk. US an ṭang tluan a, 2-0 a chakin Nations League vawi thum neih tawhah vawi thum an champion.