Last 16-ah Gauff a lut

Coco Gauff chuan straight set hmanga Oceane Dodin hnehin Miami Open khelh laiah last 16 a lut. American tleirawl duhawm hi set khatnaah 4-2 in hniam zawk hman mah se a hnu lam game 10 la zawnin 6-4, 6-0 in a chak leh daih.

US Open champion Gauff hian hnehna chang turin darkar khat bawr chauh a mamawh, match an khelh leh tur atan thahrui a khek thei tihna a ni a, quarterfinal lut tur chuan Caroline Garcia a paltlang a ngai dawn.

Inkhel dangah France nula Garcia hian Grand Slam vawi li champion tawh Naomi Osaka chu 7-6 (7-4), 7-5 in a hneh a, tunlai player hmuhnawm Gauff nen an inkhel tur hi a hmuhnawm ang.

Japanese nula Osaka tan hun ṭha a la inherchhuak thei mai rih lo, world number 1 hlui hian fa a neih hnuah tennis a khel leh a, kum 26 mi chauh la ni mah se ṭha taka inkhelh leh a la harsat rih a ni.

Hmeichhe singles inkhel dangah seeded pangana Jessica Pegula chuan Canadian player Leylah Fernandez chu 7-5, 6-4 in a hneh a, a match lehpekah chuan kum 22 mi Emma Navarro nen an intum ang.

Navarro hian inkhel dangah seeded 12-na Jasmine Paolini chu 6-2, 3-6, 6-0 in a hneh. Seeded number 10-na Daria Kasatkina chu Romanian mi Sorana Cirstea lakah 7-5, 6-4 in a chak lo.