Tlarhnung rem phui kan tum - Arteta

Arsenal manager Mikel Arteta chuan zanin dar 8:30-a Sheffield United nen Premier League an khelh tur a thlirlawk a, tun hnaia an buaina pakhat tlarhnung pawp chu remphui an tum tur thu a sawi.

Gunners hian tun season league match 22 an khelh tawhah goal 31 zet an chhuah a, a sang zual team 10 zingah Tottenham nena chhuah hnem ber an ni - zanin an hmachhawn tur Sheffield aiin khelh zat inangah goal 10-in an chhuah hnem zawk. Kum 37 mi Arteta chuan, "Tlarhnungah hian buaina chi hrang hrang kan nei a, tun hnaia kan ruahmanna thar ber chu Calum Chambers inhliam vangin a hman leh theih ta lo. Season tin hi thlir ta ila December leh Janaury thla hi chu hliam vanga buai hun chu a ni ṭhin.

"Hliam hi chu infiamna in a ken tel a ni a, hetiang harsatna nei chung hian hnehna chan kan tum tur a ni. Khelmual chhunga lut player 11 ten theihtawp an chhuah ang a, kan hmachhawn tur team a zirin a khel tur pawh kan thlang ang, anni chuan kan harsatna an sut kian ka beisei," a ti. Arsenal hian an striker leh captain ni bawk Pierre-Emerick Aubameyang chu hrem vangin an chhawr thei dawn lo a, vice captain Alexandre Lacazette-a'n league match 14 aṭanga goal nga chauh a la khung avangin tlarhma lamah buaina a awm thei.

Arteta chuan, "Laca hi inrintawkna kan siamsak a ngai, mahse goal a khung ngei chu a ngai," a ti. Spanish manager hian Sheffield United lakah captain armband hreng tur chu a player thlan a zirin a tih chian tur thu a sawi bawk.