Man City mikhual tur Arsenal
Premier League hmahruaitu Arsenal chuan Pathianni zan dar 9:00 hian Etihad Stadium an tlawh dawn - Mikel Arteta naute hi EPL champion turin an ṭha tawk tak tak em tih chu fiah an ni dawn, inkhel hautak leh hmuhnawm a ni ang.
Champion lai Pep Guardiola naute hian tun dinhmunah Arsenal hi point khatin an phak lo mek, an inkarah Liverpool an awm bawk. A sang zual pathumte hi match khat chetsual hlek chuan an dinhmun a la inthlak vek thei, final anga match pawimawh vek a ni tawh tihna a ni.
Season hmasa khan Arsenal hian hun rei tak hma an hruai a, champion beiseina pawh an nei sang hle. Mahse, season chawhnu lam hun pawimawhah Man City hi 4-1 in an ngam lo, nomawi beiseina a thamral zui bawk.
Nipui bazarah Gunners an ṭang a, an player inchuh Declan Rice an chang thei. England midfielder an neih hnuah an team a nghet sawt a, season tir lama Citizens an mikhual ṭum pawhin an hneh, zaninah pawh beisei an nei ang.
Arteta tan Man City khelmual aṭanga point thum hlawh chhuah erawh thil awlsam a ni dawn lo, manager a nih hnuah league match khelin vawi li a lut tawh a, a chak lo zawkah a ṭang vek. Chak tur chuan 'Thil Mak' a mamawh tihna a ni.
Haaland vs Havertz
Tun hma deuh khan Sir Alex Ferguson chuan, "Goal khung thei player chuan inkhelah hnehna a chan pui ang che, tlarhnung phui erawh chuan a champion pui ang che," tiin a lo sawi tawh, tun ṭumah hian he thu hi a pawimawh hle dawn.
Man City hian Erling Haaland an nei a, goal khung thei bik striker hian hnehna a chanpui a, an tlarhnung a phui bawk avangin an champion mawlh mawlh bawk. Arteta-a'n number 9 pawimawhzia a hria, a inzirna Pep-a kalphung a hre bawk.
Kai Havertz a lalut a, Germany forward hi 'False 9' atan a hmang. A tir lamah Havertz khelh danah duhkhawp lohna a lian hle, sawiseltu pawh an tam. Mahse, a khelh dan phung a bel chho zel a, tunah chuan Arsenal tan a tel loa khelh a huphurhawm tawh zawk hial ang.
Tun season EPL goal 18 khung tawh Haaland ṭhatzia inhrilh nawn a ngai lo - Arsenal tlarhnung tana buaipui awm ber a ni leh dawn. Ani ang tho hian Havertz hi leiah leh boruakah a hnawksak lehin a rinawm a, anni pahnih hi inkhel result ti danglam thei tur an ni.
Indah ṭha?
International break a awm chiah khan Kevin de Bruyne chu hliam vangin Belgium squad aṭangin a inhnukdawk nghal a, a hliam na tak tak em tih hriat a ni lo - EPL boruak san vanglai a ni a, season tir lamah hliam vangin a chawl tawh bawk - Arsenal tum turin a inkhek khala ngaih a ni.
John Stones leh Kyle Walker te erawh England tana an feh chhuahna lamah an hliam ngei a, na tak ni lo mah se Ningani kha chuan training an la zawm lo. Anni pahnih hi 100% fit an nih loh chuan Man City tlarhnung lam hi buai ve thei an ni ang.
Arsenal fachuam Bukayo Saka pawh Three Lions squad aṭangin a inhnukdawk a, tihrawl hliam na lem lo a nih avangin Man City a hmachhawn theih a beisei awm, a inlan a nih chuan Gunners goal nawrna pawimawh a ni leh dawn.
Saka ang bawkin Gabriel Magalhaes leh Gabriel Martinelli te chu Brazil squad aṭangin an inhnukdawk bawk, anni pahnih dinhmun pawh hi nimin tlai thleng khan a la chiang lo. Martinelli hmunruak chu hnawhkhah mai theih a ni ang, defender Gabriel a inlan thei lo a nih erawh chuan a pawi thui thei ang.