Sunil Chhetri record khumtu Rinzuala

I League history-a Indian zinga season khata goal khung tam ber chu Mizo tlangval Lalrinzuala a ni a, Serchhip tlangval hian March 28, Ningani zan khan khan RG Stadium, Mualpuiah record a siam. Rinzuala hian tun season I League-ah goal 15 a khung a, India captain ni lai Sunil Chhetri record a khum.

Aizawl FC-in Churchill Brothers 4-0 in an hneh a, Rinzuala hian goal hnih a khung a, goal class tak ve ve a ni. Republic Venga cheng mek Rinzuala hian record a siam zawh hian a kawr a phelh a, 'Rinzuala 18' tih inziahna chu mipui hmaah a pholang. Rinzuala hian tun season I League-ah match 18 aṭangin goal 15 a khung a, assist vawi thum a nei bawk. Match li khelh tur a la neih avangin a jersey number zat goal 18 pawh a la khung thei a, top scorer ni mek Gokulam Kerala forward Alejandro Sanchez chu goal khat chauhin a pha lo.

Aizawl FC forward Lalrinzuala chuan, "I League-a goal khung hi ka suangtuah ve ṭhin a, record erawh ka ngaihtuah phak bak a ni. India captain Sunil Chhetri record meuh khum chu a lawmawm bik hle. Pathian vang liau liau a ni a, tun dinhmun kan thlen theihna chhan ka nu leh pa te bakah ka teammate leh club neitute chungah ka lawm takzet a ni," tiin Vanglaini ka hrilh .

Rinzuala hian kum 2016 khan Bengaluru FC-ah a inpettling a, trial hi RG Stadium-ah neih a ni. Kum thum chhung BFC-ah a awm a, U16 leh U18 team-ah awmin kum 2016 hian academy player of the season-ah an thlang.

Bangalore aṭangin Gokulam Kerala reserve team a zawm a, kum 2018-22 chhung khan Gokulam tan khelin senior team chang pha lo mah se 2020-21 season-ah Kerala Premier League-ah an champion pui. Gokulam tana a khelh laiin Mizoram tan Santosh Trophy qualifier a khel a, training-naah a theihna sang tak lantir mah se inhliam vangin final round-ah a inlan tam thei lo.

Chhinga Vengin Rinzuala theihna hmuin an lalut nghal a, 2022-23 season-ah Chhingcows tan I League-ah goal thum a khung nghal. Ril phir zai vangin MPL9-ah a inlan tam thei lo a, a rawn let hnuah goal hnih a khung tho.

Aizawl FC-in Rinzuala hi an lalut a, I Day Football-ah goal nga khung nghalin final-ah a club hlui Chhinga Veng lakah an vanduai. MPL10-ah Rinzuala hi I League vanga a khel tam lo chungin goal riat a khung a, man of the match-ah vawi li an thlan bawk. Aizawl FC-in semifinal thleng pha lo mah se Rinzuala hi MPL10 top scorer leh best forward a ni a. Tunah chuan Serchhip tlangval hian I League-ah record a siam ta.