Aizawl FC an la thiam reng

30th March, 2024

Kum 2024-ah Aizawl FC-in I League-ah chak dan an theihnghilh a, an thiam ta lo emaw tih turin kuminah match riat ngawt chak hmel an hmu tawh lo. Mahse, B. Malsawmzuala enkawl Aizawl FC-in an thiam an la theihnghilh lo a; March 28, Ningani zan khan Goan club Churchill Brothers chu 4-0 in an sawp. Mizo club tan Lalrinzuala leh Lalthankhuma ten goal hnih ve ve an khung a, table-ah 11-na aṭangin pakuanaah an inhlang chho bawk.

Serchhip tlangval Rinzuala'n I League-a Indian goal khung tam ber ni turin goal hnih a mamawh a, Mizo tlangval hian Mizo club tan Mizoram chhungah ngei record hi a siam. Minute 28-naah Laldanmawia'n mual vei lamah Churchill defender kap karah a khung a, a ball pek chu Rinzuala'n angle zimna lamah goal ban perin a pet lut a, Churchill goalkeeper Bilal Khan tan dah ngaihna a awm lo.

Mizo club-in inkhel an thunun a, goal hnihna erawh hmuh tur a awm lawk lo. Minute 73-naah Lalbiakdika corner pet chu keeper Bilal-a'n hnek chhuak ṭha tawk loin ball chang fuhtu Lalramsanga'n goal-ah a pet a, goal sirah kal mah se TK-a zawnah chiah a kal - Cherhlun tlangvalin 'bel chhunga sa' a hlah lo.

AFC defensive midfielder TK-a hi goal hmaah a hriam chhunzawm a, BD-a corner kick pet bawk chu minute 86-naah a tauh goal. Aizawl FC an phur chhunzawm a, minute hnih hnuah K. Lalrinfela ball pass chu Rinzuala'n box chhungah la thlain mawi zetin goal kilah a pet lut - record siamna tur atana goal mawi a ni.

Aizawl FC hian Churchill lakah hian goal a khung li an khung a ni ringawt lo a, goal an venghim. Goan club an mikhual hmaa match hnuhnung pahniha goal kua zet chhuahtu Mizo club tan chanchin lawmawm a tling. AFC coach B. Malsawmzuala chuan, "A lawmawm takzet. Pathianin kan thawhrimna leh kan ṭawngṭaina min chhan sak a ni," tiin Vanglaini a hrilh.

Zanin dar 6:30 hian Mohammedan SC-in Inter Kashi an mikhual dawn a, Kolkata club hian champion an hnaih tawh hle. Mohammedan hian hnehna an chang a, March 31, Pathianni zana Sreenidi Deccan-in Rajasthan FC an hneh loh bawk chuan Kolkata club hi an champion thei ang.