Liverpool damdawi in a lun
Tuns season meuh chu Liverpool damdawi in khum a ruak hman meuh lo a ni ber - international break zawh ruala club tam takin hriat an châk loh ṭhin chu Liverpool fan-ten an hria a, chu chu an player inhliam thu a ni.
Reds hian chanchin lawmawm lo hriat tur an nei a, dar hliam vanga rei tak a chawlh hnua tun hnaia lo kir Andy Robertson a inhliam a, he thu buatsaih a nih lai hian a dinhmun kan hre chiang hman lo.
Kum 30 mi Robertson hi international break-ah Scotland tan a inlan a, mahse, Scottish captain hi minute 37-naah hliam vangin lakchhuah a ngai a, Pathianni zan dar 6:30-a Brighton & Hove Albion an hmachhawn dawn avangin Reds tan chuan chanchin lawmawm lo a ni.
Liverpool hian hliam vanga enkawl player pariat an nei mek a, Robertson-a'n a belh leh tak avangin player pakua an tling ta chiah bawk. Tun hnaia che ṭha tak Darwin Nunez chuan hliam vangin ram kohna pawh a chhang lo a, Pathianni zanah a lo kir thei ang em, a hriat loh.
Hetihlai hian hliam vanga chawl mek zingah Curtis Jones chu Brighton lakah lo kir thei tura beisei a ni a, April 7 zana Manchester United an lenchilh hunah Trent Alexander-Arnold leh Diogo Jota chu lo kir thei tura beisei an ni bawk.
Reds hian March 17 khan FA Cup quarterfinal-ah Manchester United chu 4-3 in an ngam lo a, an hmelma kumhlun lakah nomawi pali an beiseina a thamral a, an la na hle - Arnold leh Jota an lo kir hman chuan an phur khawp ang.
Hetihlai hian season tawp ruala contract hmang zo tur Joel Matip leh Thiago Alcantara kir hun tur sawi theih a la ni lo a, keeper chhuanvawr Alisson Becker dinhmun a la chiang lo a, Stefan Bajcetic chu April-a lo kir hman tura ngaih a ni thung.
Tun season-a League Cup nomawi chawi tawh Liverpool hian Premier League nomawi nen, season tawpa chhuak tur coach Jurgen Klopp thlah ngei an duh a, match 28 khelh tawhah table-ah pahnihna an ni mek.
An chung chiaha awm Arsenal nen an point hmuh zat inang mah se, goal difference ṭha zawk Arsenal-in hma an hruai a, pathumna Manchester City aia an sanna hi point khat chauh a ni.