Chelsea fan-te ngenna Mourinho-a'n a chhang

Season duhawm lo tak hmangtu Chelsea fan-te an manang a, an coach hlui Jose Mourinho ngaiin an au hial - tun thlatira Brentford nen 2-2 a an inhnehtawk ṭum khan fans ṭhenkhat chu Mourinho hming lamin an au rual a, Portuguese coach hian hei hi a lo hre ve reng.

AS Roma-in an ban hlim Mou chuan, "Football tihlu bertu chu fan-te an ni, tiin ka sawi fo ṭhin. Fans ho hi chuan football vangin sum an siam ve lo a, football vangin an sum an seng a, an hloh ṭhin zawk a ni! A chang chuan an chhungkaw mamawh ngawih ngawih pawh ngaihtuah loin football tan an seng a, football leh club an hmangaih avangin an neih zawng zawng an hlan phal.

"Hei vang hian an thil thlir dan hi a lai tlangpui a ni," a ti a, fan-ten an coach neih mek an duh lo a nih chuan an huat vang hrim hrim ai mahin, club an hmangaih vang a nih thu a sawi.

Mourinho chuan sawi zawmin, "Club fan-ten player emaw coach emaw, engemaw vanga an duh lo a nih chuan inngaihzawnna thila inrinawm loh san emaw, inlerh san ang a ni lo. Club an hmangaih em vang zawk a ni.

"Kei chu ka vannei a, nomawi ka chawi ṭhin avangin fan-ten min hriatrengna tur thil hi ka hnutchhiah ṭhin. Chutihruala fan-ten an hmuh lian ber chu an tana i inpekna a ni," a ti a, Chelsea fan-ten a hming an lam chhan chu club tana a theihna zawng zawng a hlan ṭhin vang a ni tih a sawi lang.

Kum 61 mi Mourinho hian June 2004 khan boruak nei hat khawpin Chelsea a zawm a, Premier League (2), FA Cup (1), League Cup (2) leh FA Community Shield a chawipui hman a, September 2007 khan ban a ni.

Mahse, Inter Milan leh Real Madrid-a a hlawhtlin hnuin, June 2013 khan a kir leh a, Premier League leh League Cup-ah vawi khat ve ve champion pui lehin, December 2015-ah an ban leh a, hemi hnuah Manchester United, Tottenham Hotspur leh AS Roma-ah kal lehin, an ban vek!

Chutihrual chuan ama sawi angin, a kalna apiangah nomawi a chawi a, Spurs-ah League Cup final hruai thleng mah se, final khelh hmaa an ban avangin a champion hman lo. Inter Milan tan pawha treble nomawi chawitu hi Chelsea fans ṭhenkhatin koh kir an duh hi a awm lo hran lo a, chutihrual chuan ban tawk thei tak manager hi fans ṭhenkhat chuan neih let an châk lo mai thei.

Mauricio Pochettino enkawlna hnuaiah Chelsea hian tun season-ah beisei an phak lo hle. Premier League table-ah 11-na an ni mek a, League Cup final lut mah se Liverpool an ngam lo bawk - FA Cup-ah semifinal an lut thung a, hei hi season thara European football khelh an beisei theihna sang ber niin a lang tawh.

Blues hian zanin dar 8:30-ah league match khel turin Burnley an mikhual ang.