India camp-ah Mizo nula panga an ko

Hockey India chuan senior camp zawm tur player a ko khawm leh ta a, heng zingah hian Mizo hmeichhe hockey khel thiam panga ngawt an tel.

India camp-a awm tur hian Lalremsiami Hmar, Lalruatfeli, Marina Lalramnghaki, Lalrindiki leh Lalhlunmawii te koh an ni. March 31, Pathianni hian training neihna tur hmun SAI Center, Bengaluru-ah an thleng ang.

Training hi April 2-7 neih tur a ni dawn a, tun ṭuma kohna dawngte hi India aiawha inlan nghal vek tur tihna ni loin, training camp lama an chet ṭhat danin final squad-ah an tel leh tel loh a hril thei dawn a ni.

Tun hnai khan Hockey National Championships khelh zawh niin, Hockey Mizoram chuan India hmun hran hrana player awmte ko khawmin inelna hi an hmachhawn a, champion zo ta chiah lo mah se pool match an paltlang avangin National Games khel turin an tling.

National Cham-pionship-ah khan Hockey Mizoram aiawha khelte kha SAI Thenzawl Hockey Training Center aṭanga zir chhuak vek an ni a, anmahni chher chhuaktu te pawh Mizo coach an ni bawk.

Tunah hian India junior core group lamah F. Lalbiaksiami, Lalthantluangi leh Lalrinpuii te an awm mek bawk a ni.