Barca enkawl turin Flick a inbuatsaih

Season tawpa coach Xavi nena inṭhen tur Barcelona-in coach an zawn chhunzawm zel a, tun dinhmunah chuan Hansi Flick chu Barca nena inhnimhnai ber nia sawi a ni - Bayern Munich boss hlui hian season tharah Barca a enkawl a nih pawhin a mak lo ang.

Hetihrual hian Barca president Joan Laporta chuan Xavi chelh an duh thu a lo sawi lang tawh a, Spanish media-ten an tarlan dan chuan Laporta hian league leh Champions League nomawi chawina chance an la neiah a ngai - khawi emaw zawk zawkah an champion a nih chuan Xavi hi chelh ngei a duh.

Laporta hian Xavi thutlukna a pawimawh ber thu a lo sawi tawh a, mahse, Spanish coach-in a thutlukna a la sawhsawn loh avangin Barca tan coach zawn a ṭhulh ngawt theih loh - Flick bakah hian Luis Enrique, Thomas Tuchel, Roberto De Zerbi leh Rafael Marquez hming pawh lamrik a ni.

Flick a inbuatsaih

Kum 59 mi Flick hian 2019-20 season khan Bayern chu treble champion a nihpui a, German Supercup, UEFA Super Cup leh Club World Cup-ah te a champion pui bawk a, 2020-21 season-ah Bundesliga nomawi a chawi nawn.

Mahse, Flick hian Bayern a chhuahsan hnuah Germany enkawlin, beisei a phak lo a, September 2023 khan ban a ni. Club enkawl a la nei leh lo a, hei tak hi Barca tan German coach chan a awlsamna tur chu a ni.

Mundo Deportivo-in an tarlan danin, Flick hian German leh Spanish ṭawng hmang kawp thei assistant a zawng mek a, tun hnaiah Barca club inrelbawl dan leh a kalphung a zir nasa hle niin an sawi bawk.

Mahse...

Laporta berin, "Xavi-a'n a thutlukna tawp a siam hma chu engmah kan ti dawn lo," tiin Spanish coach chelh an tum thu a lo sawi tawh a, mahse, an beisei league leh Champions League-ah hian an champion thei ang em, tih chu zawhna chhan harsa tak a ni.

Barca hi league-ah pahnihna niin, hmahruaitu Real Madrid chu point riatin an phak lo mek. Zanin dar 1:30-ah league match khel turin Las Palmas an mikhual dawn a, Atletico Madrid nen an inkhelh ṭuma a chet dan avanga hrem tawk Xavi-a'n a ho thei dawn lo - league match hnih hrem a ni.

Catalan club hian Champions League quarterfinal an lut tawh bawk. Mahse, Xavi thlak tura an duh zinga mi, an coach hlui Enrique enkawl Paris Saint-Germain an tawng dawn.

Beisei dang

Barca B team enkawltu, club defender hlui Rafael Márquez hming pawh sawi rik a ni a, mahse, Marquez hi media nena boruak siam a la thiam tawk loh avangin senior team enkawl nan a la hma hretah an ngai.

Tun dinhmunah Xavi chelh a lian ber a, hei erawh result-in a la hril leh tur a ni a, league-a an elpui Real lahin champion an tum an ṭhulh bik si lo - Carlo Ancelotti naute hian Pathianni zan dar 12:30-ah Athletic Bilbao an mikhual ang.

Champions League lamah Enrique-a'n a club hlui hi a lo hneh theih chuan Xavi a nghet lo sawt ang a, Enrique an awt zual sauh ang. Mahse, French club-ah kum khat contract a la nei. Hei vang hian Flick-a hming a ri ring ber lo thei lo.