Djokovic leh a coach inṭhen

Mipa tennis world number 1 Novak Djokovic leh a coach Goran Ivanisevic te chuan an thawhdunna an titawp a, a hmun ruak luah tur hi puan a la ni lo.

Serbian star Djokovic leh Ivanisevic te hi kum 2022 March thla aṭang khan an thawkdun a, coach rinrawl ber niin kum 2018 aṭanga a lo thawhpui tawh Marian Vajda te nen an thawkho vek a ni.

Grand Slam champion hnem lamah Djokovic a che ṭha a. major title 24 nei tawhin a chungnung ber. Tun season erawh a hmang ṭha lo rih hle a, boruak danglam neih an duh niin a lang.

Australian Open-ah khan semifinal-ah a chak lo a, inelna a hmachhawn hnuhnung Indian Wells-ah pawh world number 123 Luka Nardi hneh loin third round-ah a tla - Miami Open aṭangin a inhnukdawk zui bawk.

Djokovic chuan, "Hmanni deuh khan Goran nen hian kan thawhdunna tih tawp a ṭha kan ti. Tennis court lamah inzui tawh rih lo mah ila kan in ṭhian ṭhatna erawh chu a nung reng ang," tiin a sawi.

Grand Slam khelh hmabak hnai ber chu French Open a ni a, clay court inelna lian hi May 26 aṭangin Paris khawpuiah an khel ṭan ang.