ISL an khel leh dawn ta

International break hman a ni a, India pawhin Afghanistan nen FIFA World Cup 2026 qualifier match hnih khelin, a vawi khatnaah 1-1 in an inhnehtawkpui a, Guwahati-ah 2-1 in an tlawm thung - zaninah league khelh ṭan zui a ni dawn a, Indian football fan-ten Blue Tigers result duhawm lo theihnghilhin ISL lam an hawi leh tawh ang.

Zaninah match hnih khelh tur a awm dawn a, midfielder Lalremtluanga Fanai awmna Bengaluru chu tlai dar 5:00 hian Mizo player paruk awmna Odisha an hmachhawn ang - Odisha-ah hian keeper Lalthuammawia Ralte, defender Jerry Lalrinzuala, Laldinliana Renthlei, Isak Vanlalruatfela, K. Lalṭhathanga leh Jerry Mawihmingthanga te an awm.

Season tir lamah khan Odisha hian Mizo player pakua an nei a, mahse, midfielder Paul Ramfangzauva leh forward CVL Remtluanga te chu senior squad-ah an awm tawh rih lo a, Isaac Vanmalsawma'n Odisha chhuahsanin Punjab FC a zawm bawk.

Zanin dar 7:30-ah defender Ricky Lallawmawma leh PC Laldinpuia awmna Jamshedpur FC chuan midfielder Freddy Lallawmawma telna Kerala Blasters an mikhual dawn a, Pathianni zan dar 7:30-ah Lalrinliana Hnamte awmna Mohun Bagan chuan Mizo awm lohna Chennaiyin an mikhual ang.