Mbappe leh Enrique inkar a ṭha

Kylian Mbappe-a'n tun season tawp rualin Paris Saint Germain a chhuahsan dawn tih a chiang tawh a, tun hnaiah coach Luis Enrique chuan Mbappe tel loa khelh an zir a ngaih thu a sawi zauh zauh ve bawk.

Ligue 1 match ṭhenkhatah chuan Mabppe hi bench lamah dah a ni ṭhin a, hei vang hian coach leh player inkar a ṭha lo nia sawi an awm, club thuneitu lam chuan an coach Enrique thutlukna an thlawp thu an sawi lang tawh.

France captain Mbappe chuan, "Kan inkarah buaina a awm lo, kei hian harsatna leh buaina ka nei a nih chuan coach lakah ni loin thil dang lakah a ni zawk ang," tiin Spanish manager nen an inkar a ṭhat thu a sawi.

Mbappe awmna PSG hian Ligue 1-ah match 26 aṭanga point 59 hmuin hma an hruai mek a, anmahni hnaih bertu Brest aiin point 12-in an sang zawk - Pathianni zan dar 12:15 hian Marseille an lenchilh ang.