Der Klassiker: German champion zawnna a ni ta lo!

Bundesliga-ah kum 2009 aṭanga champion thei chu Bayern Munich leh Borussia Dortmund te chauh an ni a, hei vang hian season chawhnu lama Der Klassiker hi chu champion tur zawnna tiin a sawi theih ṭhin. Kuminah erawh Bayer Leverkusen chet ṭhat avangin champion zawnna tia sawi ngam a ni ta lo a, chutihrualin Bavarians tan nomawi humhim tur chuan chak a ṭul thung.

Bayern hian zanin dar 11:00 hian Allianz Arena-ah Borussia Dortmund an mikhual dawn. Thomas Tuchel-a hote hian match 26 aṭangin point 60 an hmu a, point 10-in Leverkusen an pha lo. Xabi Alonso hote hian zanin dar 8:00 hian Hoffenheim an hmachhawn ang.

Bundesliga table aṭangin Bayern-in German football-ah ro an rel tawh lo tih a lang a, international break aṭangin a lang chiang lehzual. Germany-in France leh Netherlands an hneh ṭuma Bayern aṭanga bul ṭan pha chu Joshua Kimmich leh Jamal Musiala te chauh an ni a, Musiala hi right back-a khelhtir a ni bawk.

Chutihrualin Bayern-a hmun pawimawh chang pha captain Manuel Neuer leh Leroy Sane te inhliam vangin Germany tan a khel lo a, Dortmund lakah hian an dam hman ang em tih a chiang lo. Bundesliga-a goal 31 khung tawh Harry Kane pawh England tan a inlan lo a, Borussia Dortmund laka nikuma hattrick siamtu hi a inlan theih a beiseiawm thung.

Dormtund hi kuminah club lian lakah an la che ṭha lo a, league-a sang panga club zingah hneh an la nei lo a, point 12 hmuh theih aṭangin point khat chauh an hmu. Bundesliga inkhel satliah a ni lo a, Der Klassiker a nih miau avangin Manchester United aṭanga loan hmanga Dormtmund zawmtu Jadon Sancho tan pawh hming chherna remchang a ni ang.