Man Utd an vannei ta bik lo; Spurs leh Villa ten an kalsan

Premier League-ah champion inum a ngaihnawm a, Champions League khelh tuma inum pawh boruak a sang zel. Tottenham Hotspur-in Luton Town 2-1 a lehthalin palinaah awm zawk mah se Aston Villa-in Wolverhampton Wanderers 2-0 a hnehin palina dinhmun rawn luah lehnghal.

Manchester United erawhin an chunga awmte hnaih theihna hun ṭha an bawhpelh a, Brentford nen 1-1 in an inhnehtawk. Erik Ten Hag-a hote an vannei zo ta bik lo a, paruknaah awmin pangana nen point riatin an inthlau.

Man United tan Mount-a goal a tawk lo

Gtech Community Stadium-ah Manchester United-in inkhel bul ṭan ṭha mah se darkar chanve hnuah erawh mualneitu Brentford-in inkhel an thunun. FA Cup quarterfinal-a Liverpool laka vannei Erik Ten Hag-a hote vannei nawn turah an inngai a, injury time-ah Mason Mount-a'n club tana a goal hmasa ber a khung. Mahse, injury time-ah pawh minute kuanah Kristoffer Ajer-a'n mualneitu lamin siphurh an sut a, inkhelh banah Bees an lawm ta zawk.

Inrinni zanlai inkhelah Belgium laka England tana goal khungtu Ivan Toney chu player hmuhnawm bik a ni a, Man United tlarhnung tan ven a harsa. English striker Toney hian first half-ah goal ban a pet ber a, vengtu nei lo Mathias Jorgensen pawhin crossbar a pet per.

United goalkeeper Andre Onana a khel ṭha a, an vannei tel bawk. Inkhel thununtu Bees tan Yoane Wissa-a'n darkar khat tlin hma deuhin woodwork a pet per a, Byran Mbeumo pawhin kawh zetin crossbar a pet a per bawk.

Mikhual team pawhin chance an nei ve tho a, Rasmus Hojlund-a'n hnai tak aṭangin a khung lo - khung ta pawh ni se a petu Bruno Fernandes a offside. Antony-a'n box pawn aṭangin vanneih a beisei a, mah se goal pawnah chiah a pet chhuak.

Injury time-ah Casemiro ball pek chu Mount-a'n ṭha takin a pet goal a, chakna toal turah a ngaih theih. Mahse, minute thum hnuah box chhungah Toney-a'n inrintawkna nen ball a la thla a, United player-te talbuai vekin English striker hian vengtu nei Ajer ball pe chatin Norwegian defender hian chiang zetin a pet goal.

Man United-in point khat chauh an hlawh chhuak a, UCL khelh a harsat phah dawn. Harsatna belhchhah turin Bees nen 1-1 an inhnehtawk ṭum hian Raphael Varane leh Victor Lindelof te hliam vanga lakchhuah an ni.

Spurs: Goal khung tam 5-na Son

Asian tlangval Son Heung-min hi Tottenham Hotspur chanchinah a hming a dai tawh lo ang. South Korean forward Son hian Luton Town lakah chakna goal a khung ringawt lo a, Spurs tana goal khung tam pangana a ni.

Tottenham tan Son hian match 399 aṭangin goal 160 a khung a, Cliff Jones-a record khumin panganaah an insawn chho. Palinaa awm Martin Chivers-a'n goal 174 a khung a, Son hi Spurs-a a cham zel chuan Chivers record pawh a la khung thei ang. Chutihrualin Bobby Smith (208 goals), Jimmy Greaves (381) leh Harry Kane (280) te record erawh a khum a har dawn.

Inrinni zan inkhelah hian Luton-in minute thumna lekah Tahith Chong hmangin an khung nghal a, mualneitu lamin first half-ah Timo Werner leh Son te hmangin siphurh sutna remchang nei mah se an khung lo. Son phei chu a vanduai lehzual, goal ban pahnih a pet per.

Second half-ah Spurs an vannei ta a, minute 51-naah dinglam aṭanga Brennan Johnson cross chu Luton defender Issa Kabore-a'n an lamah chiang zetin a pet lut - a tisual ve hle. Mualneitu an vannei tawk lo a, Johnson-a ball pet pawhin goalline a zawh a, Goal Line Technology aṭanga enin a goal lo chiah chiah.

A tawpah erawh Luton-in an veng seng ta bik lo. Johnson-a ball pek let chu minute 86-naah Son-a'n chiang zetin a pet goal. Tottenham 2-1 in an chak a, point thum hlu tak an hlawh chhuak.

Aston Villa an kal zel

Villa Park-ah Aston Villa-in Wolves an mikhual a, 2-0 in an hneh. Premier League-ah Unai Emery hoten point 59 an hmu a, Tottenham aiin point thumin an hmu tam zawk. Villa hi match khatin an khel tam zawk mah se an goal difference a ṭha zawk a, season thara Champions League khel turin kawng dik an zawh zel.

Wolves-in an chance ṭha an nei hmasa a, Rayan Ait-Nouri-a'n goalkeeper Emi Martinez chauh a hmachhawn chungin a khung lo. Moussa Diaby erawhin minute 36-naah box pawn chiah aṭangin kawh zetin a pet goal a, goalkeeper José Sá tan dan rual a ni lo.

Second half-ah Ezri Konsa-a'n minute 65-naah mawi zetin a pet goal a, a cross lut a ni ber. A goal dan chu eng pawh ni se Konsa-a'n tun season-a a goal hmasa ber a khung a, English defender hian Brazil lakah bench aṭangin a lut a, Belgium lakah inkhel bul a ṭan. Kum 26 mi Konsa tan kar duhthusam a ni.

Villa-in point thum hlu tak an hlawh chhuak a, chutihrualin inhliam vangin halftime-ah Ollie Watkins lakchhhuah a ngai. English striker malpui hliam hi Emery leh a hote tan buaina tham a tling ang.