Miami Open champion Collins

Tennis inelna Miami Open hmeichhe huangah Danielle Collins a champion. Nimin zing final inkhelah Collins hian Elena Rybakina chu 7-5, 6-3 a hnehin hlawhtlinna a chang.

Kum 30 mi Collins hian tun season tawp rualin tennis chawlhsan a tum thu a lo sawi tawh, a tan chuan WTA 1000 title hmasa ber a ni a, Grand Slam dawta inelna ngaihhlut hi a hun tawp dawnah a chawi tihna a ni, a ngaihlu zual ngei ang.

American nula Collins chuan, "Hetiang hun hi engtikah emaw chuan ka la tawng ve ang tiin ka suangtuah ṭhin a, ka duhthusam ti hlawhtling tur hian kawng hautak leh harsa pawh ka zawh nasa ve hle.

"A tawpah chuan ka chenna state chhung Florida-ah ngei mai ka hun duhawm ka tawng ta, ka tan chuan hun hlimawm leh theihnghilh ngai tawh loh tur a ni ang," tiin a sawi a, a tan chuan a hlu dawn tih a chiang.

Nizan zanlai khan mipa singles final khelh a ni a, seeded pahnihna Jannik Sinner leh seeded 11-na Grigor Dimitrov te inkhelin result erawh kan hre hman lo.

Miami Open-ah hian world number 1 Novak Djokovic chu a inlan lo a, world number 2 Carlos Alcaraz chu inlan mah se quarterfinal-ah Dimitrov hneh loin a zinkawng a tawp.