Mizoram 9 ball leh 10 ball inelna an zo

Mizoram Snooker & Billiards Association (MSBA) buatsaih Mizoram State 9 Ball & 10 Ball Pool Championship 2023-24 chu Inrinni tlai khan MSBA Hall, Hawla Indoor Stadium, Republic Vengthang-ah a hmawr bawk a ni.

Inelna pakhat zawk 9 Ball Pool-ah Lalsangzela, Khatla South a champion a, 10 Ball Pool-ah T. Laltlansanga, Lunglei Chanmari a champion thung.

Chawhnu lama khelh 10 Ball Pool final-ah hian Lunglei Chanmari tlangval T. Laltlansanga leh T. Lalṭanpuia, Upper Republic te an inhmachhawn a. T Laltlansanga'n 8-5 in hnehna a chang.

A hnuhnung zawka khelh 9 Ball Pool final-ah T. Laltlansanga, Lunglei Chanmari leh Lalsangzela, Khatla South te an inhmachhawn a, Lalsangzela’n 8-5 in hnehna a chang ve thung a ni.

Mizoram State 9 & 10 Ball Pool Championship 2024 hi March 18 aṭanga khan khelh ṭan a ni a, state chhung hmun hrang hrang aṭangin infiammi 80 chuang an fuan khawm.

Mizoram State 9 Ball & 10 Ball Pool Championship 2024 hi MSBA buatsaih niin, Mizoram State Sports Council (MSSC) in an sponsor a ni.