Aizawl FC an che ṭha chhunzawm dawn em?

I League-ah Aizawl FC chuan vawiin tlai dar 3:30 hian Namdhari an hmachhawn dawn a, B. Malsawmzuala hote hian match zawna hnehna chan an tum ang. Nikum November thla khan Aizawl FC hian Namdhari hi 3-0 in RG Stadium an hneh tawh a, Namdhari Stadium-ah hneh nawn an tum ang.

Mizo club-in kuminah match riat chhung chak hmel an hmuh loh hnuah March 28, Ningani zan khan Churchill Brothers chu 4-0 zetin an sawp. AFC hian point thum an hmu ringawt lo a, Serchhip tlangval Lalrinzuala chuan I League history-a season khata Indian goal khung tam ber record a siam.

Rinzuala hian tun season-ah goal 15 a khung tawh a, Gokulam Kerala striker Alejandro Sanchez chiah a tluk tawh lo. La Liga club Real Zaragoza tan pawha khel tawh Sanchez hian match 20 aṭangin goal 16 a khung a, Kerala club hian match hnih chiah khelh tur an nei tawh. Gokulam hian Manipur club pahnih Neroca leh Trau te an la hmachhawn dawn.

Aizawl FC erawhin match li khelh tur an la nei a, Namdhari an hmachhawn zawh hian Churchill Brothers chu Tilak Maidan-ah an hmachhawn leh dawn. Hemi zawh hian Manipur club pahnih Trau (April 9) leh Neroca (April 12) te chu RG Stadium-ah an mikhual dawn a, Rinzuala tan tun season I League top scorer nih theihna chance a sang hle.

Tun season I League-ah Mohammedan SC chu champion turin an dinhmun a ṭha a, Kolkata club hi Inrinni zan khan Inter Kashi nen 1-1 a an inhnehtawk avangin champion turin an la nghah leh a rih a ṭul. Kolkata club hian Shillong Lajong (April 6) leh Delhi FC (April 13) te an la hmachhawn dawn.